Fimm starfs­menn Land­spítalans með stöðu sak­bornings í máli Nóa Hrafns

Hjónin Karl Olgeirsson og Sigríður Eyrún Friðriksdóttir hafa beðið í þrjú ár eftir svörum frá ríkinu vegna læknamistaka sem ollu því að sonur þeirra lést fimm dögum eftir fæðingu. Fimm starfsmenn Landspítalans eru með stöðu sakbornings en fjallað var um málið í kvöldfréttum RÚV.

Snemma árs 2015 eignuðust hjónin soninn Nóa Hrafn. Fimm dögum eftir fæðinguna lést hann af völdum heilaskaða sem hann varð fyrir í fæðingu og er rakinn til mistaka starfsfólks Landspítalans. Karl og Sigríður Eyrún höfðu áður sagt sögu sína í Kastljósi árið 2016 þar sem þau lýstu því hversu illa fæðingin gekk.

Sjá einnig: „Af hverju kemur ekki einhver?“

„Þau eru að láta mig fara í allskonar stellingar til að rembast. Ég skildi þetta ekki. Ég fann ekki rembingstilfinningu af því að ég var mænudeyfð. Ég skildi ekki af hverju ég var að rembast, bara að láta hann lemja hausnum í vegg, bókstaflega. Ég byrjaði að biðja um keisara, hvort sem það hefði verið keisari eða hvað: Ég var bara að biðja um hjálp,“ sagði Sigríður Eyrún í viðtalinu við Kastljós.

Hefði þurft að bregðast fyrr við

Sigríður Gunnarsdóttir, framkvæmdastjóri hjúkrunar á Landspítalanum, sagði málið vera alvarlegasta tilvik sinnar tegundar á spítalanum. Hún sagði öllum bera saman um það að það hefði þurft að bregðast fyrr við.

„Það hefði verið hægt að afstýra dauða Nóa Hrafns ef það hefði verið gert. Og í því liggja þessi hræðilegu mistök,“ sagði Sigríður í viðtali við Kastljós.

Hálfu ári eftir fæðingu Nóa Hrafns lögðu hjónin fram kvörtun til Landlæknis og var kvörtunin í þrettán liðum. Tók hún meðal annars til vanmats á hættulegum aðstæðum, notkunar á hríðörvandi efnum, óviðeigandi hegðun ljósmæðra í garð foreldranna og þeirrar staðreyndar að margítrekaðar beiðnir þeirra hafi verið virtar að vettugi. Þá kærðu þau málið til lögreglu haustið 2016.

Landlæknir sagði á sínum tíma að vanræksla og mistök höfðu átt sér stað í málinu og var framkoma starfsfólk gagnrýnd. Í svari spítalans var gengist við mistökunum og meðal annars sagt að kallað hafi verið of seint á lækni sem vanmat aðstæður við komuna.

Þriggja ára bið eftir svörum 

Karl og Sigríður Eyrún leituðu til Láru V. Júlíusdóttur lögmanns um haustið 2016. Var þá send bótakrafa til ríkislögmanns og málið kært til lögreglu en ákveðið var að fresta málinu þar til niðurstaða rannsóknar lögreglu lægi fyrir.

Síðan hafa liðið þrjú ár en hjónin hafa bæði gefið skýrslu hjá lögreglu. Fimm starfsmenn spítalans hafa stöðu sakbornings í málinu og segir lögmaður hjónanna ekkert því til fyrirstöðu að skaðabótakröfunni á hendur ríkinu sé haldið áfram þó svo að niðurstaða lögreglurannsóknar liggi ekki fyrir.

„Það er engin ákæra komin og örlar ekkert á henni vegna þess að málið er einhvers staðar í skoðun á einhverju skrifborði, hugsanlega erlendis og við þurfum ekkert að bíða eftir niðurstöðu í þessari lögreglurannsókn til þess að halda skaðabótakröfunni áfram á hendur ríkinu.“

Búið er að tilkynna ríkislögmanni að óskað sé eftir afstöðu hans sem fyrst. Lögfræðingur hjónanna segist vona að málið þurfi ekki að fara fyrir dóm en ef svo fer muni því verða stefnt inn til dóms í haust eftir réttarhlé í septembermánuði.