Rúmlega tólf milljón króna skart í eins árs afmælisgjöf

Rappararnir Cardi B og Offset ætla heldur betur að taka ársafmæli dóttur sinnar, Kulture, með trompi. Slúðurmiðlar í Bandaríkjunum herma að fyrrum hjónin hyggist eyða um hundrað þúsund dollurum, tæplega tólf og hálfri milljón króna, í afmælisgjöf dóttur sinnar.

Gjöfin sem um ræðir er sérsmíðuð hálsfesti úr demöntum og hvítagulli. Menið sem hangir á keðjunni er prýtt fjórum teiknimyndafígúrum úr þáttunum Word Party, sem ku vera uppáhaldssjónvarpsþáttur Kulture.

Slúðurmiðillinn TMZ slær því föstu að Cardi hafi fengið skartgripahönnuðinn Eliantte til þess að sérsmíða gripinn, en Eliantte hefur einmitt séð mörgum af frægustu hip-hop listamönnum síðustu ára fyrir skarti.

Cardi og Offset eru þó ekki talin ætla að láta rándýra hálsfesti nægja til þess að fagna ársafmæli dóttur sinnar. Þau eru sögð ætla að halda heljarinnar veislu til heiðurs dóttur sinni, og er kostnaðurinn við hana talinn vera nálægt 400 þúsund dollurum, um fimmtíu milljónum króna.

Kulture fagnar þeim merka áfanga að ná árs aldri miðvikudaginn 10. júlí næstkomandi.