Valitor fellst á að greiða Datacell og SPP 1.200 milljónir

Greiðslumiðlunarfyrirtækið Valitor, dótturfélag Arion banka, hefur fallist á að greiða Datacell og Sunshine Press Productions (SPP) samtals 1.200 milljónir króna í skaðabætur fyrir að slíta samningi um greiðslugátt fyrir söfnunarfé til WikiLeaks sumarið 2011. Gengið hefur verið frá samkomulagi þess efnis, sem er í samræmi við dóm Héraðsdóms Reykjavíkur í apríl síðastliðnum, samkvæmt heimildum Fréttablaðsins.

Með samkomulaginu lýkur því áralöngum deilum og málaferlum félaganna fyrir dómstólum. Forsaga málsins er sú að WikiLeaks tók við styrkjum í gegnum greiðslugátt sem Datacell og SPP ráku en hún var opnuð 7. júlí 2011. Degi síðar sleit Valitor samningnum fyrirvaralaust. Hæstiréttur sló því föstu með dómi vorið 2013 að riftun samningsins væri ólögmæt og frá þeim tíma hafa málaferli staðið um skaðabótakröfur vegna riftunar. Dómkvaddir matsmenn mátu tjónið á 3,2 milljarða króna.

Valitor hafði áður sent frá sér tilkynningu í lok maímánaðar þar sem fram kom að það hyggðist áfrýja fyrrnefndum dómi Héraðsdóms Reykjavíkur sem komst að þeirri niðurstöðu að félaginu væri gert að greiða Datacell og SPP 1.200 milljónir króna í bætur. Ekkert verður hins vegar nú af því að málið komi til kasta Landsréttar.

Dómarar í málinu töldu þá að veikleikar væru á þeim forsendum sem tölfræðilegir útreikningar matsmanna byggðust á og því væri ekki unnt að leggja niðurstöðu matsgerðarinnar til grundvallar sem sönnunargagn um umfang tjónsins. Krafa um vexti og dráttarvexti aftur í tímann kom ekki til álita í dóminum. Þá hljóðaði aðalkrafa Datacell og SPP í málinu upp á 8,1 milljarð.

Sveinn Andri Sveinsson, lögmaður Datacell og SPP, sagði í samtali við Fréttablaðið eftir niðurstöðu dómsins í apríl að hann hefði vonast til þess að matsgerðinni yrði ekki ýtt til hliðar. „Svo erum við ekki sáttir við dráttarvextina en þetta er samt sigur,“ sagði Sveinn.

Í séráliti sem Kjartan Bjarni Björgvinsson héraðsdómara skilaði kom fram að hann væri sammála meirihluta dómara um að riftun samningsins hafi leitt til fjárhagslegs tjóns. Hins vegar væri hann ósammála því að skilyrði sé fyrir því að ákvarða Datacell og SPP skaðabætur að álitum. Stefnendur hafi ekki fært nægilegar sönnur á fjártjón sitt og því bæri að sýkna Valitor af kröfum þeirra.

Valitor var sem kunnugt er sett í formlegt söluferli fyrr á þessu ári og er ætlun Arion banka, eiganda félagsins, að selja greiðslumiðlunarfyrirtækið að hluta eða fullu. Gert er ráð fyrir að niðurstaða fáist í ferlið á þessu ári. Bankinn hefur áður sagt að dómur Héraðsdómur Reykjavíkur myndi ekki hafa áhrif á söluferlið. Samkvæmt heimildum Fréttablaðsins er áætlað að áhugasamir fjárfesar skili inn óskuldbindandi tilboðum í félagið fyrir miðjan þennan mánuð.

Arion banki hefur þegar tekið tillit til neikvæðra áhrifa dómsins á afkomu bankans. Í tilkynningu sem bankinn sendi frá sér eftir dóminn kom fram að hann hefði neikvæð áhrif á afkomu bankasamstæðunnar á fyrsta ársfjórðungi sem nema um 600 milljónum króna.

Landsbankinn mun þurfa að greiða hluta þeirrar fjárhæðar, eða samtals um 456 milljónir króna, sem samkomulag hefur náðst um að greiða í skaðabætur til Datacell og SPP. Ástæðan er sú að þegar Landsbankinn seldi eignarhlut sinn í Valitor til Arion banka í desember 2014 gekkst Landsbankinn í ábyrgðir fyrir 38 prósentum af þeim upphæðum sem Valitor kynni að þurfa að greiða vegna fjögurra mála. Þeirra á meðal var málarekstur Datacell og Sunshine Press Productions (SPP) gegn Valitor.