„Ofurlúxus-snekkja“ útbúin kafbát og þyrlum fer jómfrúarferðina frá Reykjavík

Snekkja sem lýst hefur verið sem „ofurlúxus-snekkju“ mun leggja af stað í jómfrúarferð sína frá Reykjavík þann 15. ágúst næstkomandi. Um borð verða tvær þyrlur, kafbátur auk fjöldi starfsfólks sem á að sjá til þess að þeir 228 farþegar sem pláss er fyrir um borð njóti lífsins.

Förinni er heitið til Kanada en snekkjan hefur verið í smíðum undanfarin ár og er í eigu Scenic, ástralsks fyrirtækis sem sérhæfir sig í lúxusferðum víða um heim. Framundan er þrettán daga sigling og miðað við lýsingar um hvað er í boði fyrir farþegana þarf engum þeirra að leiðast.

Alls eru 114 svítur um borð, allar með svölum og er sú stærsta alls 250 fermetrar að stærð. Einkaþjónn fylgir hverri svítu en alls eru 172 í áhöfn. Snekkjan er markaðssett sem heimsins fyrsta „uppgötvunarsnekkja“ en með því er átt við að farþegum verður gert kleift að uppgötva þær slóðir sem ferðast er um.

Þannig er fjöldi sérhæfðra leiðsögumanna um borð flytja fyrirlestra og leiða ferðir þegar í land er komið. Auk þess eru tvær, sex farþega þyrlur um borð auk sex manna kafbáts sem getur farið með farþega sína niður á allt að 300 metra dýpi.

Þá eru níu veitingastaðir um borð auk þess sem að mikið er lagt upp úr því að snekkjan þoli vel að sigla um hinn ískalda og oft og tíðum harðneskjulega heim norðurslóða.

Snekkjunni verður formlega gefið nafn við hátíðlega athöfn í New York í september en það er breska leikkonan Helen Mirren sem mun fá heiðurinn að því gefa snekkjunni nafn.