Hjólar í Eyþór Arnalds og segir hann stökkva á öll tækifæri til að skruma

Dóra Björt Guðjónsdóttir, bæjarfulltrúi Pírata í borgarstjórn, sakar Eyþór Laxdal Arnalds, oddvita Sjálfstæðisflokksins, um lýðskrum vegna færslu sem hann birti á Facebook síðu sinni þar sem gagnrýnir hugmyndir meirihlutans í borginni um að draga úr kjötneyslu í skólum borgarinnar.

„Jæja, þá eru Sjálfstæðismenn að leggja upp í enn eitt menningarstríðið. Í þetta sinn er það gegn auknu vali á grænmeti og ávöxtum í mötuneytum borgarinnar. Þetta nær ekki nokkurri átt lengur. Sjálfstæðisflokkurinn virðist ekki standa fyrir neitt annað en tilfinningalegt uppnám yfir ímynduðum ofsóknum,“ segir Dóra Björt.

„Ef það eru ekki mötuneyti starfsmanna sem eru fyrir þeim þá eru það reiðhjól, mathallir eða borgarlína. Alltaf eru skilaboðin sú að lífsgæði hefðbundinna Sjálfstæðismanna standi ógn af menningarmarxistunum í borgarmeirihlutanum,“ segir Dóra Björt sem þykir framganga borgarfulltrúanna kjánaleg og ófrumleg.

„Eyþór veit alveg sjálfur að það stendur ekkert til að troða veganisma ofan í kokið á einum né neinum. Honum er bara alveg sama hvað er rétt og hvað er rangt og stekkur alltaf á tækifæri til að skruma“.

Matarstefna Reykjavíkurborgar hefði verið samþykkt af öllum flokkum og markmið hennar hollur og góður matur.

Á sunnudag viðraði Líf Magneudóttir, borgarfulltrúi Vinstri Grænna, hugmyndir sínar um breytingar á matarstefnu. Hún hafi lengi verið þeirrar skoðunar að minnka eigi verulega kjötframboði í mötuneytum borgarinnar og jafnvel hætta alfarið að bjóða upp á kjöt. Þrátt fyrir að hún hafi ekki beinlínis boðað þessar breytingar sagði hún:

„Nú höfum við samþykkt nokkrar mikilvægar stefnur í Reykjavík þ.m.t. mannréttindastefnuna, matarstefnuna og aðgerðaráætlun í loftslagsmálum. Allt eru þetta stefnur sem miða að sama markmiði. Að hlúa að fólki og náttúru. Að fækka eða hætta með kjötdaga í mötuneytum borgarinnar er samnefnari þessara stefna.“

Dóra Björt segir að ramminn sé skýr. Grunnmatseðill sé notaður til sex vikna. Í matarstefnunni komi fram að fiskur skuli vera í boði tvisvar í viku, kjöt einu sinni til tvisvar í viku en grænmeti, ávextir og mjólk í boði á hverjum degi. Þá sé lagst gegn sykruðum súpum og unnum kjötvörum.

„Það er ekki stríð gegn einkabílnum að öðrum sé boðið að hjóla og taka strætó. Það er ekki stríð gegn veitingahúsum að starfsfólkið okkar fái aðgang að mötuneytum og það er ekki stríð gegn kjötætum að bjóða upp á ávexti og grænmeti í skólum barna.“

Uppfært kl. 13:36. Eyþór hefur nú svarað ásökunum Dóru. Hann þvertekur fyrir að pistill hans um að skólamatur eigi áfram að innihalda fisk, skyr, egg, kjöt og landbúnaðarvörur sé lýðskrum. Málið snúist um lýðheilsu og heilsu barna.

Hann sagði að nær væri að minnka kolefnisspor stjórnmálamanna. Eyþór bætti við að hveiti og erlendar baunir skildu eftir sig kolefnisspor og að hveiti sé ekki það hollasta fyrir börnin. Eyþór biðlar til borgarstjórnar að spara yfirlýsingarnar og hlusta á málefnalega gagnrýni. Hér er hægt að lesa pistil Eyþórs.