Ráðin nýr fjár­mála­stjóri ORF

Auður Árnadóttir hefur verið ráðin nýr fjármálastjóri hjá ORF Líftækni. Auður tekur við starfinu af Júlíusi B. Kristinssyni sem verður nýr framkvæmdastjóri viðskiptaþróunarsviðs fyrirtækisins.

Í tilkynningu frá ORF segir að Auður hafi starfað sem fjármálastjóri í yfir sextán ár, bæði hér á landi og í Bretlandi.

„Síðastliðið ár starfaði Auður hjá Advania Data Centers, þar sem hún leiddi aðskilnað reksturs gagnavera frá Advania Ísland. 2011-2018 starfaði Auður hjá Hörpu tónlistar- og ráðstefnuhúsi, eða frá opnunarári hússins og á meðan rekstri var komið á fót, starfsemin fjármögnuð og skipulögð. Þar áður var Auður fjármálastjóri Geysis Green Energy, sem var með verkefnafélög og samstarfsverkefni víða um heim, og fjármálastjóri samstæðu AT Toolcentre Ltd í Bretlandi. Auður er með MBA og BSc gráðu í viðskiptafræði frá Háskóla Íslands,“ segir í tilkynningunni.

ORF Líftækni framleiðir sérvirk prótein sem notuð eru sem innihaldsefni í BIOEFFECT húðvörur fyrirtækisins sem seld eru til læknisfræðilegra rannsókna og nýtt í önnur þróunarverkefni fyrirtækisins. Um sjötíu manns starfa nú hjá fyrirtækinu.