Bassaleikari bestar hjá Origo

Svavar H. Viðarsson hefur verið ráðinn deildarstjóri hjá Origo. Hann leiðir teymi sem mun sinna verkefnum á borð við sjálfvirknivæðingu, gervigreind og bestun ferla, að því er segir í tilkynningu.

Svavar hefur undanfarið ár starfað sem framkvæmdastjóri stafrænna viðskipta hjá Cohn & Wolfe á Íslandi en var þar áður yfir stjórnendaráðgjöf Advania. Hann hefur þó helst starfað við verkefnastjórn og stjórnendaráðgjöf í stafrænni umbreytingu í Skandinavíu fyrir stofnanir og fyrirtæki eins og LEGO, JYSK, Coca-Cola, Santander Bank, Eika Forsikring, norska herinn og norska heilbrigðisráðuneytið.

Svavar er með BSc í verkferlahagfræði og virðiskeðjustjórnun, MSc í verkefnastjórnun og MBA gráðu. Þá hefur hann einnig lokið diplómanámi í Digital Transformation frá Boston University og í Innovation Management frá MIT.

Frítími Svavars er aðallega helgaður tónlist en hann spilar á bassa í hljómsveitinni Nostal.