Biden krefst þess að Giuliani verði ekki boðið í fleiri viðtöl

Rudy Giuliani, einkalögmaður Donald Trump, forseta Bandaríkjanna, segir að hann muni ekki svara spurningum þingmanna án þess að fá leyfi frá Trump. Viðleitni Giuliani til að fá ríkisstjórn Úkraínu til að rannsaka Joe Biden og son hans Huner spilar stóra rullu í því að Demókratar hafa hafið formlegt ákæruferli á hendur Trump. Trump bað Volodymyr Zelensky, forseta Úkraínu, um að hefja slíka rannsókn og hvatti forsetann til að vinna með Giuliani og William Barr, dómsmálaráðherra Bandaríkjanna. Ekki liggur fyrir hvort til standi að kalla Giuliani í yfirheyrslu.

Framboð Joe Biden hefur krafist þess að Giuliani verði ekki boðið í fleiri sjónvarpsviðtöl.

Giuliani mætti í nokkra sjónvarpsþætti í Bandaríkjunum í dag þar sem hann hélt áfram að dreifa innihaldslausum samsæriskenningum um Biden feðgana og það að Joe Biden hafi hlutast til í málefnum Úkraínu þegar hann var varaforseti til að gagnast syni sínum, Hunter Biden, sem sat meðal annars í stjórn úkraínsks orkufyrirtækis. Samkvæmt Trump og félögum á Biden að hafa þrýst á úkraínsk stjórnvöld að reka saksóknara vegna þess að hann rannsakaði fyrirtækið.

Innihaldslausar ásakanir

Biden þrýsti á stjórnvöld Úkraínu að reka ríkissaksóknarann Viktor Shokin en forsvarsmenn Bandaríkjanna, ýmissa Evrópuríkja og alþjóðlegra stofnanna kröfðust þess á þeim tíma að Shokin yrði vikið úr starfi vegna ásakana um aðgerðarleysi gagnvart spillingu og þar að auki var hann sjálfur sakaður um spillingu.

Honum var vikið úr starfi í mars 2016 með miklum meirihluta á þingi Úkraínu.

Auk þess liggur fyrir að rannsóknin gagnvart orkufyrirtækinu Burisma og eiganda þess var lögð til hliðar árið 2014. Shokin var ekki að rannsaka fyrirtækið.

Í samtali við LA Times sagði Yuri Lutsenko, sem tók við embætti af Shokin og hætti í síðasta mánuði, að hann hefði engar vísbendingar séð um að Biden-feðgarnir hafi brotið lög í Úkraínu, þó vera Hunter Biden í stjórn Burisma gæti orðið til hagsmunaárekstra. Hann sagði sömuleiðis að Giuliani hefði tvisvar sinnum komið á sinn fund og hvatt sig til að hefja rannsókn á feðgunum. Þar að auki hafi hann einnig rætt við hann í síma.



Lutsenko sagðist þó hafa tjáð Giuliani að hann myndi ekki hefja slíka rannsókn en hann myndi þó starfa með löggæsluembættum í Bandaríkjunum ef þau hæfu rannsókn og bæðu um aðstoð.

„Ég sagði, látum þetta fara í gegnum saksóknara. Ekki forseta,“ sagði Lutsenko við LA Times. Hann sagði þar að auki að Giuliani hafi virst heltekinn af þessum ásökunum. Lutsenko sjálfur er þó talinn vera einn af þeim ýttu undir þessa samsæriskenningu gagnvart Biden-feðgunum.

Margir stuðningsmenn Trump reyndu að kynda undir þessa samsæriskenningu í fréttaþáttum Bandaríkjanna í dag eins og blaðamaður Vox fór yfir í kvöld.

Ekki eina samsæriskenningin

Auk þess að ræða samsæriskenninguna um Biden-feðgana sakaði Giuliani Demókrata um að reyna að „koma sök á Trump“ varðandi Rússarannsóknina svokölluðu. Sú ásökun tengist einnig símtali Trump og Zelensky og tölvuárás rússneskra útsendara á tölvukerfi Landsnefndar Demókrataflokksins í aðdraganda forsetakosninganna 2016. Tölvupóstar Demókrata voru svo birtir af Wikileaks skömmu fyrir kosningarnar.

Fyrirtækið Crowdstrike komst á snoðir um tölvuárásina og stöðvaði hana. Forsvarsmenn fyrirtækisins sögðu útsendara Rússlands hafa gert árásina og Alríkislögregla Bandaríkjanna, FBI, staðfesti það seinna.



Ýmsar samsæriskenningar um tölvuárásina hafa litið dagsins ljós síðan þá. Ein þeirra snýst um að árásin sjálf hafi verið tilbúningur og henni hafi verið ætlað að koma sökinni á Rússa.

Í samtali forsetanna vísaði Trump til Crowdstrike og sagðist hafa heyrt að vefþjónn Demókrataflokksins væri í Úkraínu. Hann fór þó ekki nánar út í það.

Framboð Joe Biden sendi erindi á stærstu sjónvarpsstöðvar Bandaríkjanna í dag og í því var þess krafist að Giuliani yrði ekki bókaður í fleiri viðtöl. Í bréfinu stóð að það væri ósanngjarnt gagnvart áhorfendum þessara stöðva að bjóða Giuliani að dreifa lygum og áróðri á vegum Trump.