Hundrað þrjátíu og fjórir misstu vinnuna í fjármálageiranum í dag

Andrúmsloftið var tilfinningaþrungið í höfuðstöðvum Arion banka í dag þar sem um 100 manns misstu vinnuna. Um er að ræða stærstu hópuppsögn fjármálafyrirtækis frá hruni en formaður stéttarfélags fjármálastarfsmanna skoðar nú hvort vísa beri aðgerðunum til Félagsdóms vegna samráðsleysis.

Dagurinn var blóðugur í fjármálageiranum þar sem 102 var sagt upp hjá Arion banka, 20 hjá Íslandsbanka og 12 hjá fjárhirðinum Valitor. Er þetta hluti af þeirri þróun í fjármálageiranum þar sem störfum fækkar jafnt og þétt með tölvuvæðingu.

Í upphafi árs störfuðu rúmlega 1.730 hjá bönkunum þremur en þeim hefur fækkað það sem af er ári um 182.

Arion bankar sparar 1,3 milljarða í launakostnað á ári með þessu uppsögnum sem hófust klukkan níu í morgun þar sem starfsfólk var boðað á fund með mannauðsdeild. Þar var þeim tilkynnt um uppsögn og gert að yfirgefa bankann samstundis að fundi loknum. Starfsfólk bankans sagði andrúmsloftið hafa verið hryllilegt þar sem tár féllu.

„Ég get staðfest það að þetta hefur verið erfiður dagur. Enda er hér í höfuðstöðvunum hátt hlutfall okkar starfsmanna að kveðja, sumir eftir langan starfsferil og það er eðlilegt að þá komi tilfinningarnar fram,“ segir Benedikt Gíslason, bankastjóri Arion.

Upplýsingar um uppsagnirnar láku út nokkrum dögum áður sem þykir heyra til undantekninga innan bankageirans. Benedikt segir þetta hafa verið skoðað.

„Þær upplýsingar sem birtust voru ónákvæmar og ekki réttar. Og við höfum leitað af okkur þann grun að þær hafi ekki komið hér innanhúss. Og við teljum að þær séu frekar spekúlasjónir.“

„Formaður Samtaka starfsmanna fjármálafyrirtækja hefur gagnrýnt að Arion banki hafi ekki látið trúnaðarmenn vita af uppsögnunum með lögbundnum fyrirvara. íhugar hann að vísa málinu til Félagsdóms. Þessu hafnar Benedikt.

„Við höfðum samband við trúnaðarmenn um leið og við gátum gert það. Við þurfum auðvitað að uppfylla önnur lög líka sem snúa að verðbréfamarkaðinum. Við erum skráð fyrirtæki í tveimur kauphöllum, ekki bara hér á Íslandi, og við fylgdum því öllu, lögum.“

„Það er ekki kveðið alveg á um í lögunum með hversu miklum fyrirvara, en það er kveðið á um samráð við trúnaðarmenn stéttarfélaga. Þegar svona stendur fyrir dyrum. Þannig að það er svolítið matskennt og við erum að skoða þetta,“ segir Unnur Sverrisdóttir, forstjóri Vinnumálastofnunar.

Undirbúningur fyrir uppsagnirnar og aðrar aðgerðir stóð yfir í rúma tvo mánuði og var það rætt þegar Benedikt var ráðinn bankastjóri Arion í júní. Mikilvægt sé að reksturinn sé árangursríkur í hörðu samkeppnisumhverfi þar sem álögur eru háar.