Ný bensínstöð markar tímamót

Á horni bílastæðisins við verslunarkjarnann Lindir í Kópavogi eru hafnar framkvæmdir sem marka ákveðin tímamót. Þar mun að endingu rísa fyrsta bensínstöðin á lóð Krónunnar, áþreifanlegur ávöxtur samruna N1 og Festis og birtingarmynd þess sem koma skal.

Framkvæmdirnar hófust í upphafi vikunnar og standa vonir til að þeim verði lokið „öðru hvor megin við áramót,“ að sögn Hinriks Arnar Bjarnasonar, framkvæmdastjóra N1. Stöðin verður sjálfsafgreiðslustöð, rekin undir merkjum N1 en auk bensín- og díseldælna verða jafnframt sett upp rafhleðslustæði.

Samruni N1 og Festis, sem rekur m.a. Krónuna og Elko, um mitt síðasta ár var lýst sem einni afleiðingu „Costco-áhrifanna“ svokölluðu. Innreið bandarísku heildverslunarinnar vorið 2017, sem velti 28 milljörðum króna í fyrra, hefur haft margvísleg áhrif á íslenskan smásölumarkað. Til að mynda lögðu verslanirnar Kostur og Víðir upp laupana auk þess sem Hagar og Olís sameinuðust.

Sjá einnig: Olíufélögin í uppbyggingu

Samrunarnir tveir fólu í sér samlegðaráhrif sem segja má að Costco hafi frumsýnt hér á landi: Að ná fram betri nýtingu lóða með því að opna bensínstöðvar á bílastæðum stórra verslana; eins og Krónunnar í tilfelli N1 eða verslana Haga í tilfelli Olís.

Bensínstöðin sem nú rís við Lindir er einmitt í þeim anda. Eftir að hafa lokað tveimur benínstöðvum í Hæðar- og Hlíðarsmára í Kópavogi, og uppfyllt þannig eitt af skilyrðunum Samkeppniseftirlitsins fyrir samrunanum, tekst N1 þannig að nýta fermetra sína betur - um leið og viðskiptavinir nýta búðarferðina betur. Þetta er í takt við þróun verslunarhúsnæðis erlendis að sögn Hinriks.

Hann segir að þrátt fyrir að framkvæmdir séu ekki hafnar við aðrar, sambærilegar bensínstöðvar á lóðum Festis sé samtalið hafið. Vonir standi til að stöðvarnar verði svokallaðar fjölorkustöðvar, þar sem ökumenn geti fyllt á margvíslega tanka. Hugsunin sé að viðskiptavinir geti klárað öll sín helstu viðskipti á sama stað í einni ferð. „Rafhleðslustöðvar fyrir utan matvöruverslanir eru klárlega alveg skynsamlegar, þú ert kannski 20 mínútur inni í búðinni og getur nýtt tímann til að fylla á bílinn.“

N1 á nú í viðræðum við Reykjavíkurborg um að færa bensínstöð félagsins á Ægissíðu yfir á lóð Krónunnar á Fiskislóð. Þannig væri hægt að hefja annars konar uppbyggingu á Ægissíðulóðinni, til að mynda að reisa þar íbúabyggð. Þær viðræður hafa þó gengið hægar en í Kópavogi, en ætla má að áform borgarstjórnar um að fækka bensínstöðvum innan borgarmarkanna leiki þar hlutverk.