Allt á floti í Kringlunni

Vatnsúðakerfi Kringlunnar fór á fullt upp úr klukkan fjögur í dag. Vatn fossar út úr sprinkler-kerfinu og er gólfið orðið rennandi blautt.

Ástandið virðist mest á annarri hæð Kringlunnar í grennd við rúllustigann upp á Stjörnutorg.

„Ég veit bara að ég er að moka út vatni,“ segir Erik Pálsson húsvörður í Kringlunni í samtali við Vísi. Hann sagðist ekki vita hvað hefði valdið ástandinu.

Samkvæmt upplýsingum frá slökkviliðinu, sem var að mæta á staðinn með dælubíla, er um fjögurra sentimetra lag á gólfi Kringlunnar á um eitt hundrað fermetra svæði.

Baldvina Snælaugsdóttir, markaðsstjóri Kringlunnar, segir í samtali við Vísi að enginn eldur hafi komið upp í Kringlunni. Eina tilgátan þessa stundina snúi að því hvort átt hafi verið við brunaboða.

Allt sé á floti á annarri hæð frá Gallerí 17 að rúllustiganum við Stjörnutorg.

Fjallað verður um málið í fréttum Stöðvar 2 klukkan 18:30.