Mikill vindur og hálka á vegum á Suðurlandi

Hálka er á vegum á Suðurlandi, þá sérstaklega í Eyjafjöllum og í Mýrdal. Þorsteinn M. Kristinsson varðstjóri hjá lögreglunni á Suðurlandi segir að við aðstæður sem þessar ættu sem fæstir að vera á ferli.

Vegagerðin gaf fyrr í dag út tilkynningu þar sem greint var frá því að akstursskilyrði gætu orðið erfið á Reynisfjalli og í Mýrdal. Hálka væri á vegum og spáð væri miklum vindi.

Þorsteinn segir vindinn vera mikinn. „Allt að 40 m/s eins og staðan er núna. Það hefur ekki verið tekin ákvörðun um hvort veginum yfir Reynisfjall verði lokað en það hlýtur að koma til greina,“ segir Þorsteinn.

„Það eru alltaf einhverjir á ferli, ferðamenn og fólk sem þekkir ekki aðstæður. Við svona aðstæður, gula viðvörun, ættu bara sem fæstir að vera á ferli, segir Þorsteinn M. Kristinsson, varðstjóri hjá lögreglunni á Suðurlandi.

Suðurland: Akstursskilyrði gætu orðið erfið á Reynisfjalli og í Mýrdal í dag. Spáð er miklum vindi, hálka er á vegum og spáð snjókomu á Reynisfjalli. Vegfarendur eru beðnir að taka tillit til þessa í ferðaáætlunum dagsins #færðin

— Vegagerðin | Iceland Roads (@Vegagerdin) December 7, 2019