Formaður VR segir spennuþrungið andrúmsloft í Frakklandi

Verkfallsaðgerðir vegna áforma frönsku ríkisstjórnarinnar um breytingar á eftirlaunakerfi landsins héldu áfram í dag. Almenningssamgöngur hafa verið í algjörum lamasessi, skólar lokaðir, og útlit fyrir að aðgerðri haldi áfram. Ragnar Þór Ingólfsson, formaður VR, er staddur í París og segir mikla spennu í loftinu.

Að sögn Ragnars hafa margir hópar komið saman og mótmælt og það á mismunandi forsetum. Grundvallarástæðan sé fyrirhugaðar breytingar á eftirlaunakerfi Frakka sem hann segir hækka lífeyrisaldur og skerða réttindi. Einnig beinist mótmælin þó gegn ástandi loftslagsmála.

Til átaka kom á milli lögreglu og mótmælenda í gær, bál voru kveikt og táragasi varpað. Ragnar segist hafa orðið var við átökin, mótmælin hafi þó almennt farið ágætlega fram. Ragnar segir lítinn hóp hafa gengið hart fram en hann hafi verið áberandi, fréttaflutningur hafi verið mestur af rúðubrotum og íkveikjum. Hann segist skynja mikla spennu en einnig góða stemningu.

Almenn óánægja með Macron er svo ekki til þess fallin að lægja öldurnar. Samkvæmt síðustu skoðanakönnunum eru nærri tveir af hverjum þremur Frökkum óánægðir með störf forsetans. Hann hefur raunar ekki komið út í plús síðan í ársbyrjun 2018.