Segir mikil­vægt að passa að gera Al­þingi ekki að dóms­sal í Sam­herja­málinu

Bryndís Haraldsdóttir, þingmaður Sjálfstæðisflokksins, segir að varast þurfi að gera þingsalinn að dómssal í Samherjamálinu með því að þingmenn ákveði ákveðna upphæð til eftirlitsstofnana til að rannsaka Samherjamálið. Hanna Katrín Friðriksson, þingmaður Viðreisnar, segir aftur á móti rannsóknina ekki eiga að byggjast á trausti til ráðherra og fjárveitinga þeirra.

Þingmenn mættust í Sprengisandi á Bylgjunni í dag til að ræða Samherjamálið. Fyrst til umræðu var opinber rannsókn á málinu en hart hefur verið tekist á þingi um hvaða leið eigi að fara til að auka fjármagn til eftirlitsstofnana.

Þá einna helst deilt um það hvort löggjafinn eigi að setja auka fjármagn í rannsókn með fjárlögum eða hvort stofnanirnar eigi sjálfar að óska eftir fjármagninu til framkvæmdavaldsins, það er til ráðherra málaflokksins, eftir að umfang rannsóknar er vitað.

Mikilvægt að löggjafinn haldi í hlutleysi

Willum Þór Þórsson, formaður fjárlaganefndar og þingmaður Framsóknarflokks, sagði mikilvægt að löggjafinn héldi í hlutleysi sitt varðandi rannsóknina.

„Það hefði auðvitað verið mjög sérstakt ef þingið ætlaði að fara að ýta fjárheimildum að einhverjum stofnunum út af einhverjum málum ef engin beiðni um slíkt liggur fyrir eða neitt samtal eða neitt slíkt.“

Bryndís Haraldsdóttir, þingmaður Sjálfstæðisflokks, tók undir þetta.

„Ég hef svolítið velt þessu fyrir mér út af því að mér þykir líka að í þessari sorglegu umræðu allri þá finnst mér við þurfa að passa okkur ofboðslega mikið á því að gera þingsalinn ekki að dómssal.“

Óttast skilaboðin frá þinginu

„Á sama tíma og við höfum verið að ræða hversu brugðið okkur er og hversu reið við erum á þessum fréttum, þá á sama tíma erum við að taka hérna eitthvað fjármagn og segja: „Þið eigið að rannsaka nákvæmlega þetta mál.“ Hvaða skilaboð eru það frá þinginu? Erum við að segja: „Rannsakið þetta og komist að niðurstöðu núna strax og ákærið þetta fólk,“ eða eigum við að leyfa þessum stofnunum að vera hlutlausar og vinna sína vinnu og treysta þeim til þess að þau geri það hratt og örugglega án beinnar aðkomu þingsins?“ bætti Bryndís við.

Andrés Ingi Jónsson, fyrrum þingmaður Vinstri grænna og nú óháður á þingi benti aftur á móti á að traust almennings hafi hrunið gagnvart stóru fyrirtæki og ekki sé hægt að byggja rannsóknina á trausti á framkvæmdavaldinu.

Mikilvægt að stofnanirnar hafi sjálfstæði

Hanna Katrín Friðriksson, þingmaður Viðreisnar, tók undir orð Andrésar.

„Þannig að segja: „Þið gerið þetta án þess að fá meiri pening og svo áttum við okkur á því hvað Samherjamálið kostar okkur og þá komum við og biðjum við um pening,“ þá erum við farin að falla í þessa gildru sem þú ert að tala um, að framkvæmdarvaldið tekur þá ákvörðun og segir já eða nei eftir því hvernig vindar blása.“

„Það er mjög mikilvægt að löggjafinn veiti nægilegt fé inn í þessar stofnanir til að þær geti tekið sjálfstæða ákvörðun, sjálfstæða ákvörðun um hversu djúpt og langt þau fari inn í rannsóknina,“ sagði Hanna Katrín í Sprengisandi á Bylgjunni í morgun.