Mátti vart tæpara standa í flughálku á jóladag

Það mátti vart tæpara standa þegar ökumaður bifreiðar missti stjórn á bíl sínum í hálku er hann ók eftir hraðbraut í Alaska í Bandaríkjunum á jóladag. Bíllinn rétt skautaði fram hjá bílstjóra dráttarbíls sem staddur var í vegkanti að huga að annarri bifreið.

Atvikið náðist á upptöku myndavélar í lögreglubíl sem einnig var á vettvangi. Lögregla í Anchorage, stærstu borg Alaska, birti myndbandið á Facebook-síðu sinni í gær og biðlaði til ökumanna að fara sérstaklega varlega í vetrarfærðinni.

„Ef eitthvað hefði farið öðruvísi á þessum þremur sekúndum hefði þetta getað orðið afar sorglegur dagur. Við erum þakklát fyrir að enginn slasaðist. Þetta minnir okkur á að, sérstaklega yfir veturinn þegar vegir eru þaktir ís og snjó, verða allir að fara einkar varlega undir stýri. Hægið á ykkur,“ skrifar lögregla við myndbandið, sem sjá má hér að neðan.