Átta mánaða barn greint með mislinga

Mislingar hafa greinst í átta mánaða gömlu barni sem kom til landsins frá Stokkhólmi þann 28. desember síðastliðinn.



Frá þessu er greint á vef Landlæknis en í gær hafði barnaspítali Hringsins samband við sóttvarnalækni vegna barnsins. Hafði það veikst erlendis á aðfangadag, fengið kvef og hita.

Þann 28. desember síðastliðinn fékk barnið útbrot en sama dag flaug það ásamt foreldrum sínum frá Stokkhólmi til Íslands með Icelandair flugi nr. FI307.

Á vef Landlæknis segir að barnið sé nú í einangrun og á batavegi. Þar kemur einnig fram að haft verði samband við þau flugfélög sem fluttu barnið og farþegar upplýstir um smithættu.

Þar segir einnig að smithætta sé mest áður en útbrot koma fram en eftir það dvínar smithættan og gengur yfir á nokkrum dögum. Einkenni geta komið fram hjá smituðum 1-3 vikum eftir smit.

Heilsugæslan í landinu hefur verið upplýst og er fólki ráðlagt að hafa samband við lækni í síma eða ígegnum Heilsuveruef grunur leikur á smiti af völdum mislinga.

Frekari upplýsingar um mislinga má finna hér.