Tugir þúsunda þegar náð í smitrakningaforritið

Fleiri en tuttugu þúsund manns höfðu náð í smitrakningasmáforrit landlæknis á Android-símum á miðnætti. Tölur fyrir Apple-síma liggja enn ekki fyrir. Til stendur að senda smáskilaboð í alla síma á Íslandi með beinum hlekk á forritið.

Snjallforritið var þróað á methraða til að hjálpa heilbrigðisyfirvöld að rekja smit kórónuveiru í samfélaginu. Það var gert aðgengilegt í forritaverslunum stóru tæknifyrirtækjanna Google og Apple í gær.

Ingi Steinar Ingason, teymisstjóri hjá embætti landlæknis, staðfestir að ríflega 23.000 manns hafi sótt forritið í Playstore Google á miðnætti. Lengur taki að fá tölfræði úr Appstore Apple en stefnt sé að því að hafa tölur tiltækar fyrir daglegan upplýsingafund almannavarna klukkan 14:00.

Hann segist ekki hafa í höndunum hlutfall Android og Apple síma á Íslandi en skýtur á að samanlagt gætu 30-40.000 manns hafa sótt forritið nú þegar. Smitrakningateymi hafa enn ekki notað gögn úr forritinu.

Gera forritið aðgengilegt alls staðar og senda skilaboð í alla síma

Starfsmenn landlæknis vinna nú að því að leysa úr ýmsum göllum sem hafa komið upp. Ingi Steinar segir að fjöldi ábendinga hafi borist embættinu eftir að forritið fór í loftið í gær. Ætlunin er að uppfæra forritið á morgun.

Á meðal þess sem væntanlegir notendur hafa rekið sig á eru smávægilegir gallar sem tengjast stillingum síma þeirra. Þannig hefur staðfestingarhnappur ýst út af skjánum hjá þeim sem eru með stillt á stærstu gerð leturs á Apple-símum. 

Þeir sem eru með síma sína skráða erlendis af ýmsum ástæðum hafa ekki getað fundið forritið í forritaversluninni þar sem það var aðeins gefið út fyrir Ísland. Ingi Steinar segir að nú hafi verið ákveðið að dreifa forritinu út um allan heim til að leysa það vandamál.

Þá hefur borið á því í Playstore Google að leitarvél finni ekki forritið jafnvel þó að leitað sé að nafni þess staf fyrir staf. Ingi Steinar segir að það taki leitarvélina nokkra daga að koma forritinu inn í leitarniðurstöðurnar. Í millitíðinni sé hægt að finna forritið með því að setja gæsalappir utan um leitarorðið. 

Þá stendur til að senda smáskilaboð í alla síma á landinu með beinum hlekk á forritin, bæði fyrir Android-stýrikerfi og Ios-stýrikerfi Apple, líklega á morgun.

Hægt er að nálgast smitrakningasmáforrit landlæknis hér.