Ævar Þór Benediktsson, betur þekktur sem Ævar vísindamaður, hefur glatt þúsundir barna með upplestri á bókum sínum í beinni útsendingu í samkomubanninu. Eftir nokkurra daga páskafrí fer Ævar aftur af stað í dag og byrjar nú á þriðju bókinni í bókaflokknum um bernskubrek Ævars. Á slaginu klukkan eitt hefst lestur á bókinni Gestir utan úr geimnum.
Hægt verður að fylgjast með útsendingunni í spilaranum hér fyrir neðan. Þessi frétt verður uppfærð daglega með streymi dagsins. Fyrri upplestrum verður svo jafnóðum bætt við neðst í fréttinni.
Streimt hefur verið frá upplestri Ævars frá fyrsta degi hér á Vísi. Fyrst las hann bókina Risaeðlur í Reykjavík og svo tók við önnur bókin sem er með titilinn Vélmennaárásin. Fyrsti upplesturinn hefur til dæmis verið spilaður hátt í 15 þúsund sinnum á Facebook þegar þetta er skrifað. Áhugasamir geta nálgast eldri útsendingar hér á Vísi og á Facebook síðu Ævars vísindamanns.
Hér að neðan má sjá fyrri upplestra Ævars.
