Þór frestar Goðamótunum vegna kórónuveirunnar

Þór Akureyri hefur frestað Goðamótum í 6. flokki karla og 5. flokki kvenna í fótbolta vegna kórónuveirunnar. Mótin áttu að fara fram í Boganum á Akureyri um helgina.

Í gær greindu forsvarsmenn Goðamótanna frá því að þau færu fram. Þeim hefur hins vegar snúist hugur og mótunum hefur verið frestað.

Í frétt á heimasíðu Þórs kemur fram að ákvörðunin hafi verið erfið en félagið hafi viljað axla samfélagslega ábyrgð með því að fresta mótunum.

„Sú ákvörðun að halda mótahaldi til streitu var tekin út frá okkar bestu vitund miðað við tilmæli ÍSÍ og þeirra samtali við Landlæknisembættið á fundi sem haldinn var í gær. Þeir sem að mótinu standa eru ekki sérfræðingar á þessu sviði og ekkert fordæmi er fyrir þeirri stöðu sem er uppi. Ákvörðunin var því erfið, líkt og sú ákvörðun sem hefur verið tekin nú og er endanleg,“ segir í fréttinni.

Goðamót 6. flokks karla fer fram 15.-17. maí og goðamót 5. flokks kvenna 1.-3. maí.

Um síðustu helgi var Nettómótinu í körfubolta frestað vegna kórónuveirunnar.