Hreyfivika UMFÍ hefst á mánudaginn

Hreyfivika UMFÍ rúllar í gang á mánudaginn níunda árið í röð. Með átakinu eru landsmenn hvattir til þess að flétta hreyfingu inn í daglegt líf og virkja fólk í kringum sig. Öll hreyfing telur, eina skilyrðið er að hún veiti fólki ánægju.

„Þetta verður að vera skemmtilegt til þess að við viðhöldum þeim lífsstíl að rækta líkamann. Hreyfing gerir manni gott og ætti að vera leiðarljós í gegnum lífið. Það eru skilaboðin,“ segir Sabína Seinunn Halldórsdóttir, verkefnastjóri Hreyfiviku UMFÍ. Fjörug dagskrá fer í gang um allt land á mánudaginn sem hægt er að fylgjast með á hreyfivika.is

Aldrei fleiri boðberar

Boðberar hreyfivikunnar geta verið einstaklingar, íþróttafélag, fyrirtæki eða sveitarfélag sem stendur fyrir viðburði og hvetur þannig samferðafólk sitt til að hreyfa sig. Stöðug fleiri standa fyrir slíkri hvatningu.

„Hreyfivikan hefur vaxið ár frá ári með dyggri þátttöku boðbera um allt land sem skipuleggja dagskrá á hverjum stað. Í ár verða viðburðir á yfir 40 stöðum víðsvegar um landið og sérstaklega ánægjulegt að sjá mörg bæjarfélög bætast í hópinn og taka þátt í fyrsta sinn. Fyrirkomulagið er misjafnt á hverjum stað. Daglega sjáum við viðburði bætast við inni á síðuna hreyfivika.is og svo er hvert bæjarfélag með kynningar á eigin dagskrá,“ segir Sabína.

Allir í Evrópu hreyfi sig reglulega

Um alla Evrópu verður fólk á iði næstu vikuna ásamt Íslendingum en Hreyfivikan eða MOVE WEEK er stærsta lýðheilsuherferð í Evrópu.

„Ég er daglegu í sambandi við kollega mína um alla Evrópu varðandi skipulag. Þetta eru ólíkar aðstæður í hverju landi og óvenjulegir tímar. Við Íslendingar búum að því að geta verið úti og nýtt náttúruna í útvistina enda snúast margir viðburðanna um gönguferðir, fjallgöngur eða göngur milli bæjarfélaga. Það er frábært að geta verið svona mikið úti í náttúrunni."

Brenniboltaáskorun

„Við hjá UMFÍ erum ekki endilega að hamra á því að stunda ákveðnar íþróttir heldur að þátttaka í hverskonar hreyfingu skiptir máli. Við ákváðum að skora sérstaklega á grunnskólana að taka þátt í hreyfivikunni og gáfum brennibolta til skóla um allt land. Ölgerðin gekk til liðs við okkur í átakinu og gefur öllum þyrstum kristal að drekka.“

#mínhreyfing – leikur á Instagram

UMFÍ vill að allir landsmenn finni sína uppáhalds hreyfingu og setji mynd af sér inn á Instagram með myllumerkinu #mínhreyfing sem hvatningu fyrir aðra. Dregið verður úr innsendum myndum og eru gjafir frá Farm Hotel Efstadal í verðlaun. 

„Þetta snýst um allir sem hafa áhuga finni þá hreyfingu sem hentar hverjum og einum. Við bendum á að það er svo margt hægt að gera annað en fara beinlínis í ræktina og hamast þar, eins og covid-ástandið hefur sýnt okkur. Gönguferð í 30 mínútur telur, það þarf engan spandexgalla til. “ segir Sabína.