Pólland segist hafa ráðist óvart inn í Tékkland

Pólsk stjórnvöld hafa viðurkennt að hermenn á þeirra vegum hafi í síðasta mánuði tekið sér stöðu innan landamæra Tékklands, og þannig „ráðist óvart“ inn í landið. Varnarmálaráðuneyti Póllands segir að um mistök hafi verið að ræða.

Pólskir hermenn sem komið var fyrir á landamærum ríkjanna til að sinna landamæravörslu og draga þannig úr hættunni á útbreiðslu kórónuveirunnar tóku sér stöðu við kapellu, Tékklandsmegin við landamærin, í síðasta mánuði. Þar héldu þeir til í einhverja daga og meinuðu meðal annars tékkneskum ríkisborgurum að fara að kapellunni.

Tékknesk yfirvöld höfðu samband við þau pólsku þegar þau fengu veður af málinu og hermennirnir færðu sig. Pólsk yfirvöld segja um misskilning að ræða, en fulltrúar utanríkisráðuneytis Tékklands segjast enn ekki hafa fengið opinbera skýringu á málinu.

BBC fjallar um málið, en fyrst var greint frá því í tékkneska staðarblaðinu Denik.

Þar segir að hermennirnir hafi fyrst tekið sér stöðu Póllandsmegin við landamærin. Þeir hafi hins vegar ákveðið að fara yfir lítinn læk sem landamæri ríkjanna tveggja liggja við, og taka sér frekar stöðu við kapellu innan tékknesku landamæranna. Ekki liggur fyrir hvers vegna þeir ákváðu að gera það, né hversu lengi nákvæmlega „innrásin“ varði.