Hjörtur og Jón Dagur mættust í markalausu jafntefli

Hjörtur Hermannsson og Jón Dagur Þorsteinsson mættust í leik Bröndby og AGF í dönsku deildinni í fótbolta. 

Hjörtur byrjaði inn á fyrir Bröndby og Jón Dagur fyrir AGF en Jóni var skipt út af á 67. mínútu. Leiknum lauk með fremur bragðdaufu 0-0 jafntefli en aðeins voru gerðar þrjár marktilraunir í leiknum.

AGF er í 3. sæti deildarinnar sem veitir þátttökurétt í undankeppni Evrópudeildarinnar en Bröndby situr í 4. sæti, fimm stigum á eftir AGF.

Ragnar Sigurðsson sat allan tímann á varamannabekk FCK í 1-1 jafntefli gegn Nordsjælland á útivelli, en FCK er í 2. sæti, 11 stigum á eftir toppliði Midtjylland.