Ragnar missir af leik FCK í kvöld af fjöl­skyldu­á­stæðum

Ragnar Sigurðsson hefur þurft að draga sig úr leikmannahópi FCK fyrir leikinn gegn AaB í dönsku úrvalsdeildinni í kvöld af fjölskylduástæðum.

Unnusta Ragnars er ólétt og eiga þau von á sínu fyrsta barni saman á allra næstu dögum en hann er nú floginn heim til Íslands af þeim sökum og missir af leik kvöldsins.

Ragnar gekk í raðir FCK á nýjan leik í janúar en hefur ekki spilað leik í dönsku úrvalsdeildinni hingað til. Hann var ekki í leikmannahópnum í fyrstu tveimur leikjunum eftir kórónuveiruhléið en var á bekknum í 1-1 jafnteflinu gegn Nordsjælland um helgina.

Samningur hans við félagið rennur út í sumar.