Öruggt hjá Liverpool sem færist enn nær titlinum

Liverpool vann Crystal Palace örugglega 4-0 í síðasta leik dagsins í ensku úrvalsdeildinni. Færist liðið enn nær Englandsmeistaratitlinum.

Crystal Palace heimsótti Anfield í kvöld og var ekki um neina frægðarför að ræða. Heimamenn fóru hamförum og gestirnir vissu ekki sitt rjúkandi ráð. 

Trent Alexander-Arnold skoraði fyrsta mark leiksins á 23. mínútu beint úr aukaspyrnu. Það var svo Mohamed Salah sem jók forystu heimamanna undir lok fyrri hálfleiks og staðan 2-0 þegar liðin gengu til búningsherbergja í hálfleik.

Síðari hálfleikur var endurtekning á þeim fyrri en Fabinho skoraði þriðja mark Liverpool á 55. mínútu. Sadio Mané skoraði svo fjórða og síðasta mark leiksins þegar tæplega sjötíu mínútur voru á klukkunni.

Lokatölur 4-0 og Liverpool nú með 23 stiga forystu á toppi deildarinnar.  Crystal Palace er sem fyrr í 9. sæti en liðið er með 42 stig þegar sjö umferðir eru eftir.