Undir­rituðu samninga um stuðnings­lán til lítilla og meðal­stórra fyrir­tækja

Seðlabankinn hefur undirritað við samninga við fjóra banka um veitingu stuðningslána til lítilla og meðalstórra fyrirtækja. Lánin voru kynnt sem hluti annars aðgerðapakka ríkisstjórnarinnar vegna kórónuveirufaraldursins, sem valdið hefur miklum efnahagsþrengingum víða um heim.

Í tilkynningu frá Seðlabankanum segir að bankinn hafi undirritað samninga um stuðningslán með ábyrgð ríkissjóðs við Arion banka, Kviku banka, Landsbankann og Íslandsbanka. Markmið lánanna sé að viðhalda atvinnustigi og efnahagsumsvifum með stuðningi við minni rekstraraðila sem hafi orðið fyrir tímabundnu tekjufalli vegna faraldursins.

„Með gerð samninganna hefur skapast grundvöllur fyrir því að hrinda framangreindu efnahagsúrræði vegna kórónuveirufaraldsins í framkvæmd með þeim skilyrðum sem fram koma í lögunum, samningi fjármála- og efnahagsráðherra við Seðlabankann, reglugerð um stuðningslán og samningi milli Seðlabankans og lánastofnana. Tekið verður við umsóknum um stuðningslán í miðlægri þjónustugátt á vefnum island.is.“