Lægðin stjórnar veðrinu næstu daga

Lægðin sem nálgast frá Grænlandshafi mun stjórna veðrinu næstu daga og hreyfist hún norðaustur yfir landið á morgun og hinn. Virðist hún ætla að verða óvenjudjúp miðað við árstíma, að því er fram kemur í hugleiðingum veðurfræðings hjá Veðurstofu Íslands.

Því má búast við vaxandi vindi með rigningu í dag og hvessir undir Eyjafjöllum síðdegis. Þá verður einnig hvasst á miðhálendinu í kvöld og tekur gul viðvörun gildi um kvöldmatarleytið þar. Búist er við 13 til 18 metrum á sekúndu en vindstyrkur getur náð allt að 25 metrum á sekúndu í hviðum og er göngufólk og fólk í tjöldum sérstaklega varað við aðstæðum á svæðinu.

Ferðalangar og útivistarfólk er því hvatt til þess að kynna sér veðurspár vel áður en lagt er af stað í ferðalög. Grjóthrun og skriður geta orðið í fjalllendi þegar rignir og má reikna með vatnavöxtum í ám.

Á morgun snýst í norðanátt og bætir í rigningu á Vestfjörðum. Það kólnar í veðri á öllu á landinu og er spáð ákveðinni norðanátt á norðanverðu landinu um helgina. Veðrið verður þó þurrara og hlýrra fyrir sunnan og má reikna með að norðanskotið gangi niður á mánudag.

Veðurhorfur á landinu næstu daga

Á fimmtudag:

Gengur í suðvestan 13-18 m/s við SA-ströndina en norðaustan 13-20 NV-til. Annars hægari og rigning í öllum landshlutum. Hiti víða 7 til 17 stig, hlýjast og úrkomuminnst á NA-landi.

Á föstudag:

Allhvöss eða hvöss norðanátt, rigning og svalt veður á V-verðu landinu, en mun hægara, hlýrra og úrkomuminna eystra.

Á laugardag og sunnudag:

Útlit fyrir áframhaldandi norðanátt með kalsarigningu á N-verðu landinu, en bjartviðri og mildara veðri sunnan heiða.

Á mánudag:

Lægir líklega og léttir til víða um land og hlýnar heldur, en áfram lítilsháttar væta og fremur svalt NA-til.

Á þriðjudag:

Lítur út fyrir hægar suðlægar áttir, lítilsháttar vætu hér og þar og hlýnandi veður norðan heiða.