Meta virði öskurverkefnisins á 1,7 milljarða

Íslandsstofa hefur sent út sérstaka fréttatilkynningu þar sem lýst er yfir mikilli ánægju með árangurinn sem stofan telur mega merkja af hinni umdeildu öskurmarkaðsherferð. Í tilkynningunni kemur meðal annars fram að þau meti virði átaksins á 1,7 milljarð króna.

Eins og Vísir hefur greint frá hefur herferðin verið afar umdeild og þá hefur listmaðurinn Marcus Lyall lýst því yfir að hann telji að hugmyndin sé illa fengin, nánar tiltekið frá sér og verkefni sem hann stóð að og kallast Scream The House Down.

Tekin hafa verið upp rúmlega 25.000 öskur.

Íslandsstofa hefur vísað erindi Lyalls á bug en bendir nú á að Let it out, sem er hluti af markaðsverkefni Inspired by Iceland, hafi vakið gríðarlega athygli erlendra fjölmiðla sem hafa fjallað um Ísland og verkefnið á mjög jákvæðum nótum.

„Á fyrstu fimm dögum aðgerðarinnar hefur hún verið til umfjöllunar í um 350 erlendum miðlum sem ná samanlagt til tæplega 1,5 milljarða neytenda. Margir stærstu og víðlesnustu miðlar heims hafa fjallað um verkefnið í fréttum sínum.“

Íslandsstofa bendir á nokkur dæmi um umfjöllun á netmiðlum, eftirfarandi:

• ·(US) CBS: Iceland is broadcasting the world’s screams to relieve coronavirus stress
• ·(US) New York Post: Iceland offering to broadcast your coronavirus stress screams
• ·(US) NPR: App lets you destress by screaming into Icelandic wilderness
• ·(India) The Indian Express: Iceland is inviting people to scream out frustrations into ‘beautiful, wide-open spaces’
• ·(US) Food & Wine: Screaming into the Icelandic wilderness is the 2020 therapy you didn’t know you needed
• ·(US) CNN Travel: Feeling frustrated? Then scream your head off in Iceland’s vast wilderness
• ·(UK) Independent: Iceland invites people to scream out their frustrations in its wild landscapes
• ·(DE) Süddeutsche Zeitung Online: Iceland invites you to scream
• ·(DE) Berliner Morgenpost: Island ladt ein,seinen Frust herauszuschreien Wortwortlich
• ·(DE) RTL: Den Corona-Frust ins Handy brullen und in Islands Weiten schicken
• ·(US) Fox News: Iceland offering coronavirus stress relief
• ·(US) Lonely Planet: Why Iceland wants you to send in your screams of frustration

Að auki hefur verið fjallað um verkefnið í þáttum á MSNBC sjónvarpsstöðinni, The Today Show í New York, Good Morning Philly, Sky News, og í útvarspfréttum NPR og BBC svo eitthvað sé nefnt.

„Virði þessarar umfjöllunar er metið sem 1,7 milljarður,“ segir í tilkynningu. Og að alls hafi tæplega 300.000 heimsóknir komið á vefsíðuna frá því hún fór í loftið, og tekin hafa verið upp rúmlega 25.000 öskur.

Farið fram úr björtustu vonum

Kynningarmyndband herferðarinnar hefur alls verið spilað rúmlega 2.8 milljón sinnum.

Í fréttatilkynningunni er vísað til orða Sigríðar Daggar Guðmundsdóttur, fagstjóra ferðaþjónustu hjá Íslandsstofu, sem segir að árangurinn hafi farið fram úr björtustu vonum. „Það er ljóst að hún hefur hitt beint í mark hjá markhópum Íslenskrar ferðaþjónustu og hefur vakið verðskuldaða athygli. Fólk kann sannarlega að meta að við sýnum aðstæðum þeirra skilning og bjóðum þeim upp á að losa um streitu, samhliða því sem við gefum þeim tækifæri til að skoða stórkostlega náttúru Íslands og vekja athygli þeirra á þeirri víðáttu sem hér er hægt að upplifa.“

Stöð 2 mun í kvöld fjalla nánar um þetta átak og fara út í Viðey sérstaklega til að skoða tiltækið í návígi.