„Brenn ekki af einhverjum hefndarþorsta gagnvart þessum einstaklingum“

„Eins og komið hefur fram fékk ég mikið af ógeðslegum hótunum í kjölfar færslu á Instagram. Mig langar til þess að taka það sérstaklega fram að ég ber engan kala til samfélaganna í Kópaskeri og Raufarhöfn. Ég dæmi engan fyrir gjörðir einstaklinga sem þurfa greinilega á hjálp. Það væri bæði heimskulegt og ósanngjarnt,“ segir leikkonan Þórdís Björk Þorfinnsdóttir í færslu á Facebook.

Hún fékk töluvert magn af skilaboðum á samfélagsmiðlum þar sem henni er hótað ofbeldi og jafnvel lífláti eftir að hún birti færslu á Instagram-síðu sinni þar sem hún sagðist ekki mæla með því að fólk heimsótti Kópasker og Raufarhöfn. Færslan féll í grýttan jarðveg meðal íbúa og voru viðbrögðin ansi hörð.

Vísir greindi frá málinu fyrr í dag.

Hún segir að málið geti kennt samfélaginu hvernig fólk hagar sér á samfélagsmiðlum.

„Af tveimur skjáskotum var skyndilega búið að úthrópa mig sem hrokafulla forréttindakonu (svo það sé kurteisislega orðað) og margt verra. Mér ofbauð sérstaklega þegar sveitarstjóri var farinn að stíga fram og saka mig um slíkt í viðtali við fjölmiðil. Ég held að við séum öll sek um að dæma fólk á samfélagsmiðlum. En ég held að mikið væri unnið ef allir reyndu að staldra við, íhuga hverju það skilar að ata einhvern auri og leyfa helst öðrum að njóta vafans.“

Hún segir að þessi gagnrýnisstormur hafi orðið til þess að vanstilltir einstaklingar hafi misst stjórn á sér.

Eitthvað sem þyrfti að stöðva

„Ég hef áður fengið svipaðar hótanir, aðallega út af þeim glæp að búa til tónlist með Reykjavíkurdætrum sem fellur ekki að smekk þeirra. Það er eiginlega hálfsúrealískt að vera kominn á þann stað að reyna bara að hunsa skilaboð sem þessi og halda áfram með mitt líf. Það þurfti því að benda mér á að þetta væri eitthvað sem yrði að stöðva og þess vegna ætla ég að leggja fram kæru. Ég brenn ekki af einhverjum hefndarþorsta gagnvart þessum einstaklingum. Ég vil að þeir fái alvarlegt tiltal og fræðslu svo að þessi hegðun þeirra þróist ekki út í eitthvað enn alvarlegra.“

Þórdís segist oft tækla hlutina með húmor og segir frá nokkuð skemmtilegu atviki sem átti sér stað fyrir sýningu hjá leikhópinum Lottu eins og lesa má hér að neðan.