Dæmd í 20 mánaða fangelsi fyrir að smygla inn 903 grömmum af MDMA

23 ára gömul kona var fyrr í mánuðinum dæmd fyrir stórfellt fíkniefnalagabrot en hún hafði staðið að innflutningi rúmra 900 gramma af MDMA dufti í júlí 2019. Hún var dæmd í 20 mánaða fangelsi af Héraðsdómi Reykjaness.

Konan hafði reynt að flytja inn MDMA duft með 83-84 prósenta styrkleika sem ætlað var til söludreifingar hér á landi í gróðraskyni að því er segir í dómnum. Úr duftinu hefði verið hægt að framleiða um 7.981 MDMA töflu.

Konan flutti efnið inn til landsins sem farþegi í flugi frá Brussel í Belgíu til Keflavíkurflugvallar og hafði hún falið efnið innanklæða, innvortis og í farangri sínum. Konan játaði sök fyrir dómi en konan hefur ekki verið dæmd fyrir refsivert athæfi áður.

Þá lýsti hún jafnframt yfir iðrun sinni vegna málsins fyrir dómi og segir í dómsuppkvaðningu að engin ástæða þyki til að draga hana í efa. Hún hafi tekið að sér innflutning efnanna en ekkert benti til að hún hefði komið að skipulagningu eða fjármögnun innflutningsins.