„Dæmi­gert janúar­veður“ næstu daga

Árið byrjar með úrkomu víða um land og er spáð skúrum eða slydduéljum. Þó ert bjart með köflum norðaustantil og heldur þurrt. Hiti hefur fallið frá því á gamlársdag og verður á bilinu 0 til 6 stig á landinu í dag.

Þá kólnar á morgun og er spáð snjókomu eða éljum víða á landinu, einkum fyrir norðan. Kalt heimskautaloft færist yfir landið og fellur hiti talsvert. Um kvöldið lægir og rofar til á sunnanverðu landinu en spáð frosti í öllum landshlutum á bilinu 3 til 10 stig.

Þetta kemur fram í hugleiðingum veðurfræðings hjá Veðurstofu Íslands þar sem segir einnig að dagarnir á eftir séu órólegir. Landsmenn megi búast við „dæmigerðu janúarveðri“ með lægðagangi og umhleypingum. Sólin sé hins vegar farin að hækka á lofti og dagarnir farnir að lengjast.

Veðurhorfur á landinu næstu daga

Á föstudag:

Norðvestan 13-20 m/s, en talsvert hægari SV- og V-lands. Snjókoma eða él N-til á landinu, en léttskýjað sunnan heiða. Frost 2 til 10 stig. Lægir og rofar til um kvöldið.



Á laugardag:

Gengur í hvassa suðaustanátt með snjókomu og síðar slyddu eða rigningu. Hlýnandi veður. Suðvestlægari og skúrir eða slydduél um kvöldið, en léttir til NA-lands.



Á sunnudag:

Suðvestan 10-18 m/s. Bjartviðri A-lands, annars skúrir eða él. Hiti um eða yfir frostmarki. Lægir um kvöldið.



Á mánudag:

Norðvestlæg átt með slyddu eða rigningu og síðar snjókomu á A-verðu landinu, en éljum V-til. Kólnandi veður.



Á þriðjudag:

Útlit fyrir suðvestanátt með éljum S- og V-lands.