Í minningu Ölla

Örlygs Arons Sturlusonar var minnst fyrir leik Njarðvíkur og Keflavíkur í Domino's deild karla í kvöld. Örlygur lést á þessum degi, 16. janúar, fyrir 20 árum.

Fyrir leikinn ræddi Kjartan Atli Kjartansson við þá Hermann Hauksson, Benedikt Guðmundsson og Teit Örlygsson um Örlyg, eða Ölla eins og hann var jafnan kallaður.

Einnig voru sýnd viðtöl sem tekin voru við ýmsa sem þekktu Ölla.

Guðjón Guðmundsson og Svali Björgvinsson lýstu leiknum í kvöld. Þeir lýstu einnig einum af síðustu leikjunum sem Ölli spilaði í desember 1999 þegar Njarðvík vann Keflavík.

Allur aðgangseyrir leiksins rann í Minningarsjóð Ölla. Honum er ætlað að styrkja börn til íþróttaiðkunar sem ekki eiga kost á því vegna bágrar fjárhagsstöðu foreldra eða umsjónarmanna. Áhorfendur, starfsmenn, dómarar og leikmenn borguðu sig inn á leikinn.

Alls safnaðist ein milljón króna í kvöld og þá keypti Coca Cola á Íslandi síðustu treyjuna sem Ölli spilaði í á 500.000 krónur.

Þeir sem vilja leggja málefninu lið geta lagt inn á reikning sjóðsins: 0322-26-021585, kt. 461113-1090.

Umfjöllun Stöðvar 2 Sports fyrir leikinn má sjá hér fyrir neðan.