Haukur frá Austur­ríki og til Men&Mice

Haukur Gíslason hefur verið ráðinn sem sviðsstjóri sölu hjá Men&Mice.

Í tilkynningu frá fyrirtækinu segir að hlutverk Hauks verði að leiða stækkandi söluteymi félagsins á alþjóðavísu, en fyrirtækið þróar og selur hugbúnaðarlausnir til stjórnunar á innviðum netkerfa stórra alþjóðlegra fyrirtækja.

„Haukur hefur áratuga reynslu í því að leiða söluteymi til árangurs. Hann flutti nýlega aftur til landsins frá Austurríki en þar starfaði Haukur sem framkvæmdastjóri sölusviðs kortaþjónustufyrirtækisins PXP Financial. Þar áður starfaði Haukur hjá Valitor í sjö ár sem yfirmaður alþjóðasölu og hjá Latabæ þar sem hann sá um sölu og dreifingu á efni til erlendra sjónvarpsstöðva á árunum 2003 til 2010.

Haukur starfaði einnig sem sölustjóri hjá Tal og Flugfélagi Íslands.

Haukur er með B.S. gráðu í viðskiptafræði frá Háskólanum á Bifröst og með diplómapróf í samningatækni og leiðtogahæfni frá Harvard háskóla,“ segir í tilkynningunni.