Hafa skipulagt eftirpartý í anda hins viðfræga Euroclub

Eurovision-aðdáendur ætla að fagna úrslitum Söngvakeppninnar á laugardagskvöldið næstkomandi á Iðnó þar sem félagar í FÁSES (Félag áhugafólks um Söngvakeppni evrópskra sjónvarpsstöðva) hafa skipulagt eftirpartý í anda hins viðfræga Euroclub. Fram koma meðal annars KEiiNO, Hera Björk og Regína Ósk eins og segir í tilkynningu frá FÁSES.

Á hverju ári er opnaður skemmtistaður í tengslum við Eurovision í borginni sem heldur keppnina sem kallast Euroclub. Þar geta eldheitir aðdáendur slett úr klaufunum undir valinkunnum Eurovision-lögum ásamt því að njóta lifandi flutnings margra keppenda. Fimm lög verða flutt á úrslitakvöldi Söngvakeppninnar á laugardagskvöldið í Laugardalshöllinni en þá verður ákveðið hvaða lag við Íslendingar sendum í Eurovision 2020 í Rotterdam. 

„Við í FÁSES ákváðum að koma með stemminguna heim og æfa okkur í að halda Euroclub, því að þegar við Íslendingar vinnum þurfum við að skipuleggja slíkan klúbb hér í Reykjavík,” segir Ísak Pálmason stjórnarmaður í FÁSES.

„Þar hafa aðdáendur keppninnar tækifæri til að skemmta sér ásamt keppendum við Eurovision-tónlist fram á rauða nótt.”

Ísak segir að meðlimir FÁSES hafi haft samband við norska bandið KEiiNO og reynt að fá þau til landsins.

„Þau voru mjög spennt og ætla að mæta með prógrammið sitt sem þau hafa verið að túra með um Evrópu síðan þau unnu símakosninguna í Eurovision 2019.”

Vildu einnig íslenskar Eurovision-stjörnur

Árlega leggja margir Eurovision-aðdáendur upp í ferðalög til að vera viðstaddir úrslit forkeppna um alla Evrópu og eru nokkrir erlendir aðdáendur væntanlegir til Íslands.

„Okkur fannst nauðsynlegt að vera með íslenskar Eurovision-stjörnur líka svo við höfðum samband við Heru Björku og Regínu og þær voru meira en til í að koma fram. Svo erum við með leynigesti sem við ætlum ekki að kjafta frá til að halda smá spennu í þessu,” bætir Ísak við.

Dj Ohrmeister frá Þýskalandi, sem er einn af plötusnúðunum sem spila á hverju ári á Euroclub, mætir á svæðið og spilar öll skemmtilegustu Eurovision danslögin.

„Dj Ohrmester er einn af vinsælustu Eurovision plötusnúðum í heimi og spilar reglulega á Eurovision skemmtistöðum um alla Evrópu.”

Júróklúbburinn opnar strax eftir úrslit Söngvakeppninnar laugardagskvöldið 29. febrúar á Iðnó í miðborg Reykjavíkur. Miðasala fer fram á fases.is.