Endur­greiðslu­kröfur á Icelandair á borði Neyt­enda­sam­takanna hlaupa á hundruðum

Hundruð mála eru á borði Neytendasamtakanna vegna endurgreiðslna sem ekki hafa borist fyrir flugmiða sem keyptir voru í ferðum sem ekki voru farnar. Formaður Neytendasamtakanna segir að fundur með forsvarsmönnum Icelandair sé áætlaður nú um mánaðamótin þar sem þessi mál verða rædd.

Breki Karlsson, formaður Neytendasamtakanna, segir í samtali við fréttastofu að öll ferðatengd Covid-mál sem komin voru á borð samtakanna í páskafríinu hafa verið orðinn rúmlega 800 talsins. Síðan þá hafi þeim einungis fjölgað. Af þeim málum séu nú nokkur hundruð mál sem tengist Icelandair.

Til standi að forsvarsmenn Icelandair fundi með Neytendasamtökunum nú um mánaðamótin til að ræða þessi mál. „Fyrir sumarfrí áttum við fund með forsvarsmönnum Icelandair þar sem okkur var tjáð að þeir myndu stefna að því að um miðjan ágúst myndu þeir klára allar endurgreiðslur frá því fram að lokum maí sem þeir áttu eftir að greiða. Síðan ætla þeir að reyna að vinna upp hratt og örugglega það sem stendur út af,“ segir Breki.

Gera sér grein fyrir erfiðri stöðu félagsins en ekki sé hægt að hnika rétti neytenda

Elstu málin séu frá því í apríl. „Við töluðum um það á síðasta fundi sem var í júlí að við myndum hittast um þessi mánaðamót sem eru núna í næstu viku og fara aftur yfir stöðuna,“ segir Breki.

Ekki hefur enn verið boðað til fundarins. „Þetta er á dagskrá og við munum hittast á næstunni og fara yfir stöðuna.“

„Við gerum okkur náttúrulega grein fyrir ákaflega erfiðri stöðu félagsins en það er ekki þar með sagt, þetta er skýlaus réttur neytenda og það er ekkert hægt að hnika því.“

„Hafi flug verið fellt niður þá hafa þeir skýlausan rétt á endurgreiðslu innan sjö daga. Okkar mat er það að dragist endurgreiðslan umfram það þá eigi þeir líka rétt á dráttarvöxtum. Þetta er fjárkrafa sem neytendur eiga inni hjá fyrirtækinu alveg eins og fyrirtæki eiga rétt á dráttarvöxtum dragist greiðslur frá einstaklingum,“ segir Breki.

Oft fljótlegra að sækja um endurgreiðslu hjá greiðslukortafyrirtækjum

Ekki hefur komið til umræðu hvort til málaferla verði gripið. Neytendur geti hins vegar sótt um endurgreiðslu hjá greiðslukortafyrirtækjum sem taki oft styttri tíma. „Þó að það taki ákveðinn tíma er það oft og tíðum, eins og staðan er núna, fljótlegra en að bíða eftir að Icelandair endurgreiði. Það geti þó tekið allt að tvo mánuði að afgreiða slík mál á þann hátt.

„Það hefur oft og tíðum reynst öruggari leið fyrir fólk að fá endurgreitt. Þó tveir mánuðir hljómi langur tími þá hefur fólk verið að bíða mun lengur eftir endurgreiðslum frá Icelandair,“ segir Breki.