Thiago sagður búinn að ná samkomulagi við Liverpool

Thiago Alcantara, miðjumaður Bayern Munchen, er sagður vera búinn að ná samkomulagi við Liverpool.

Spænski miðjumaðurinn er nú í fríi á Spáni en þýska blaðið BILD greinir frá því að Thiago og Liverpool hafi nú þegar samið um kaup og kjör.

Nú vantar bara að Liverpool og Bayern nái saman en samningur þess spænska við þýska liðið rennur ekki út fyrr en næsta sumar.

Þýski risinn er ekki sagður vilja láta Thiago fara fyrir minna en 30 milljónir evra en Liverpool er ekki tilbúið að borga þá upphæð.

Leikmenn Bayern snéru til baka til æfinga á þriðjudaginn en ekki er reiknað með Thiago mæti til æfinga fyrr en í fyrsta lagi í næstu viku.