Smit í Borgaskóla og allir í úrvinnslusóttkví

Upp hefur komið Covid-19 smit í Borgaskóla í Grafarvogi. Meðan verið er að vinna að smitrakningu eru allir starfsmenn og nemendur settir í úrvinnslusóttkví.

„Það er gert til að gæta fyllsta öryggis og varúðar og eru foreldrar vinsamlegast beðnir um að halda nemendum heima á meðan unnið er að smitrakningu í skólanum,“ segir á vef skólans.

Nánari upplýsingar verði sendar út um leið og þær liggi fyrir.

Nemendur í Borgaskóla eru í 1. til 7. bekk. Um fimmtíu starfa við skólann samkvæmt upplýsingum á heimasíðu hans.