Þrautseigja er lykilinn

Vodafone, í samstarfi við Rafíþróttasamband Íslands, stendur fyrir námskeiði í CS:GO þar sem breski rafíþróttaþjálfarinn Cal Brawn, betur þekktur sem Caspian, miðlar af þekkingu sinni og reynslu. 

Námskeiðið, sem fer fram í gegnum netið, hefst á mánudaginn. Það er ókeypis, öllum opið og hægt er að skrá sig á það með því að smella hér.

„Í þessu námskeiði verður farið yfir ólíka þætti Counter-Strike, frá því að æfa á skilvirkan hátt, leika ólík hlutverk í leiknum og skoða mismunandi kort. Í námskeiðinu verður farið yfir grunnatriðin fyrir yngri spilara,“ sagði Cal í samtali við Vísi.

Námskeiðið hentar öllum

„Ég fer frekar almennt í hlutina en nota mikið úr sálfræði. Þetta námskeið hentar bæði lengra komnum spilurum og byrjendum, jafnvel þeim sem hafa aldrei spilað áður. Eftir námskeiðið eiga þeir að búa yfir grunnþekkingu á leiknum.“

Cal hefur þjálfað lið víðs vegar um Evrópu, m.a. á Íslandi, um mislanga hríð. „Fyrir tveimur árum þjálfaði ég lið sem kallaðist þá War Monkeys. Ég hef þjálfað nokkuð lið á Íslandi og er núna með Dusty.“

Eldri spilarar á Íslandi

Cal segir að Íslendingar hafi dregist aðeins aftur úr í rafíþróttasenunni.

„Það er ólík menning á Íslandi en annars staðar í Evrópu. Spilarar þar eru venjulega mjög ungir, mjög metnaðarfullir en búa yfir lítilli reynslu. Á meðan eru íslenskir spilarar mun eldri. Þeir eru í vinnu, með fjölskyldu og hafa ekki mikinn tíma til að æfa sig. Þeir þurfa því að æfa á mjög skilvirkan hátt og nýta tímann,“ sagði Cal.

En hvað þurfa spilarar að gera til að ná langt í rafíþróttum?

„Þrautseigja er líklega lykilorðið. Margir ungir leikmenn búa ekki yfir þeim eiginleika, að sýna þrautseigju í mótlæti og því að klífa á toppinn. Ég hef séð marga spilara koma og fara og af þeim liðum sem ég hef þjálfað eru bara einn eða tveir sem hafa farið úr því að vera efnilegir í að spila í atvinnumannaliðum,“ svaraði Cal.