Fresta öllum sýningum og viðburðum næstu tvær vikur

Borgarleikhúsið og Þjóðleikhúsið hafa ákveðið að fresta öllum sýningum og viðburðum næstu tvær vikurnar og var ákvörðunin tekin eftir nýjustu fréttir um útbreiðslu kórónuveirunnar og tilmælum frá yfirvöldum.

Í tilkynningu frá Borgarleikhúsinu segir: „Þetta á bæði við um þau verk sem þegar eru í sýningum sem og þau sem til stóð að frumsýna á tímabilinu. Við viljum ítreka að allir miðar eru tryggðir og enginn gestur missir sinn miða. Hér er aðeins um að ræða tímabundna frestun í ljósi aðstæðna í þjóðfélaginu. Upplýsingar um nýja sýningartíma verða sendar út til allra miðahafa eins fljótt og auðið er.“

Síðasta sólarhringinn greindust 99 manns smitaðir af kórónuveirunni innanlands og hafa þeir ekki verið fleiri frá því um mánaðamótin mars-apríl þegar fyrsta bylgja faraldursins var í gangi.

Þjóðleikhúsið hefur einnig sent frá sér yfirlýsingu og þar kemur það sama fram, að öllum sýningum sé frestað næstu tvær vikurnar. 

„Í samræmi við ný tilmæli vegna kórónuveirufaraldursins frestar Þjóðleikhúsið öllum leiksýningum sem ráðgerðar voru næstu tvær vikurnar. Þeir sem eiga miða á þessar sýningar munu fá tilkynningu um nýjar sýningardagsetningar. Einnig mun miðasala okkar og þjónusta færast alfarið yfir í síma og á net á þessum tíma.“