Vopnahlé í Líbíu

Stríðandi fylkingar í Líbíu undirrituðu samkomulag um varanlegt vopnahlé í Sviss í dag.

Átök hafa geisað um alla Líbíu frá því einræðisherranum Muammar Gaddafi var steypt af stóli árið 2011. Síðustu ár hefur þjóðfrelsisher Khalifas Haftars, sem berst fyrir fulltrúadeild líbíska þingsins sem var kjörin árið 2014, barist gegn alþjóðlega viðurkenndri ríkisstjórn landsins.

Báðar fylkingar hafa notið stuðnings utanaðkomandi aðila í gegnum tíðina. Rússar hafa sent málaliða til að styðja þjóðfrelsisherinn og Sameinuðu arabísku furstadæmin selt honum vopn. Tyrkir sendu svo hersveitir til stuðnings ríkisstjórnarinnar í janúar. 

Lítið hefur verið um átök frá því fjórtán mánaða umsátri þjóðfrelsishersins um höfuðborgina Trípólí lauk í júní. Nú sér loksins til sólar og eftir áratug af linnulausum átökum vonast menn til þess að geta samið um frið. Erindreki Sameinuðu þjóðanna í Líbíu segir undirritun vopnahléssamkomulagsins afar þýðingarmikla.

„Samþykkt var að allar sveitir muni snúa aftur í sínar búðir. Sömuleiðis munu allir málaliðar og erlendar hersveitir yfirgefa Líbíu á næstu þremur mánuðum.“

Stríðandi fylkingar munu funda í Túnis í næsta mánuði um að semja um frið.