Viðbúnaður á Keflavíkurflugvelli vegna gruns um kórónuveirusmit

Mikill viðbúnaður var á Keflavíkurflugvelli í kvöld vegna gruns um kórónuveirusmit um borð í flugvél Icelandair. Vélin var að koma frá Kaupmannahöfn og lenti klukkan hálf ellefu.

Þetta staðfestir Ásdís Ýr Pétursdóttir, upplýsingafulltrúi Icelandair, í samtali við Vísi. Hún segir að ákveðið verklag fari almennt í gang hjá þegar grunur er um slíkt smit um borð og að viðbrögð félagsins hafi verið í samræmi við það.

Framhaldið sé í höndum fulltrúa almannavarna sem taki á móti farþegum vélarinnar og meti hvaða ráðstafanna verði gripið til.

Ekki liggur fyrir að svo stöddu hve margir farþegar voru um borð í vélinni.