Skreytum hús: „Vá þetta er bara allt annað“

„Fyrir þættina fékk ég mörg hundruð umsóknir, en það var eitthvað við myndina af risíbúðinni hennar Elfu sem stoppaði mig um leið,“ segir Soffía Dögg Garðarsdóttir í fyrsta þættinum af Skreytum hús, sem fór í loftið á Vísi í dag. Hjúkrunarfræðingurinn Elfa Rún Guðmundsdóttir býr í fallegri íbúð í miðbæ Reykjavíkur og Soffía Dögg tekur til hendinni í stofunni hjá henni og einnig í öðrum herbergjum.

„Ég keypti þessa íbúð í mars, fékk hana svo afhenta í ágúst og svolítið bara henti öllum húsgögnunum mínum inn og hélt svo bara áfram með lífið,“ útskýrir Elfa. 

Hlýlegri stofa á óskalistanum

Stofan hennar var í aðalhlutverki í þættinum en þar var stór hvítur og tómur veggur sem Soffía beið spennt eftir að breyta.

„Þessi veggur alveg kallaði á að við myndum setja hillur á hann,“ segir Soffía. Elfa bað einnig um aðstoð við að finna réttan stað fyrir sjónvarpið. Soffía Dögg er einstaklega sniðug við að endurraða húsgögnum og nýta það sem til er á heimilinu í svona breytingum stað þess að kaupa allt nýtt.

„Það sem mig langaði að gera var að gera stofuna aðeins hlýlegri og skemmtilegri,“ 

segir Elfa. Þá var komið markmið með breytingunum. Eins og sjá má í þættinum, var hún ótrúlega ánægð með útkomuna þegar Soffía Dögg hleypti henni aftur inn á heimilið eftir breytingarnar.

Hægt er að horfa á fyrsta þáttinn af Skreytum hús í spilaranum hér fyrir neðan en þættirnir verða einnig aðgengilegir á Stöð 2 Maraþon.

Mottan er akkerið

„Við viljum skapa „contrast“ og dýpt. Með því til dæmis að setja fallegan lit á endavegginn,“ sagði Soffía Dögg um ástæðu þess að hún vildi mála í rýminu. Hvítir veggir, hvítur panell og hvítir bitar í loftinu væri að láta allt renna saman í eitt. Elfa valdi fölbleikan lit og gjörbreytti það rýminu.

„Mér fannst svona smá óþægilegt að velja bleikan lit til þess að mála stofuna mína,“ segir Elfa en hún málaði vegginn sjálf og setti saman húsgögnin sem þær höfðu valið saman. Hún raðaði öllum hlutunum sínum á eldhúsborðið og þá mætti Soffía með bílinn fullan af vörum til viðbótar.

„Svo ætla ég að senda þig út að fá þér kaffisopa og svo kalla ég á þig þegar ég er búin,“ segir Soffía Dögg. „Ég er mjög til í það,“ var Elfa snögg að svara.

Eitt af þeim lykilatriðum sem Soffía Dögg breytti í rýminu var að setja þar stóra ljósa mottu.

„Mottan er eins og akkeri inni í rýmið. Því stærri motta, þýðir bara að við höfum meira land til að byggja á.“

„Oh my god“

Soffía Dögg kom með mjög gott ráð varðandi púða sem bæði gerir þá flottari og gefur fólki útrás í leiðinni. Einnig hvernig best sé að ákveða sídd á gardínum. Svo notaði hún spegil til að breyta sófaborði og var útkoman skemmtileg.

„Ég hef ótrúlega gaman að taka venjulega hluti og breyta þeim bara örlítið og gera þá að mínum án þess að vera með einhverjar stórkostlegar breytingar,“ útskýrir Soffía Dögg.

„Oh my god“ voru fyrstu viðbrögð Elfu þegar hún kom heim og sá rýmið.

„Vá þetta er bara allt annað.“

Fáir hlutir en mikil breyting

Elfa var sérstaklega ánægð með það hvernig Soffía Dögg hafði tekið það sem sem var nú þegar til í íbúðinni og raðað því flott upp. Stórar hillur settu alla fallegu hlutina hennar í sviðsljósið ef svo má að orði komast.

„Þetta nær mér líka svo vel,“ sagði Elfa, sem var í skýjunum með breytingarnar.

„Í sjálfu sér voru ekkert rosalega margir hlutir að fara inn í íbúðina hennar Elfu. Við vorum að kaupa tvo skápa, þeir voru ekki inni í stofunni. Við settum upp hillur á endavegginn og við skiptum út mottu og settum sófaborð,“ 

segir Soffía Dögg í lok þáttarins. Í ítarlegri bloggfærslu á síðunni Skreytum hús má finna frekari upplýsingar um breytingarnar og þær vörur sem Soffía Dögg notaði til þess að breyta rýminu.

Hægt er að sjá breytinguna og horfa á þáttinn í heild sinni í spilaranum hér ofar í fréttinni. Þættirnir eru sýndir á þriðjudögum hér á Vísi og fara samhliða því inn á Stöð 2 Maraþon.