Eyjamaðurinn Elliði Snær Viðarsson er á sínu fyrsta tímabili í atvinnumennsku og hann er að gera flotta hluti undir stjórn Guðjóns Vals Sigurðssonar hjá Gummersbach.
Elliði Snær Viðarsson átti mjög góðan leik um síðustu helgi í uppgjöri gömlu stórveldanna Gummersbach og HSV Hamburg í þýsku b-deildinni í handbolta.
Elliði Snær og félagar klikkuðu ekki á þessu prófi heldur unnu 26-25 sigur í æsispennandi leik sem þýðir að Guðjón Valur Sigurðsson er með liðið sitt á toppnum í deildinni.
Guðjón Valur sótti Elliða Snæ út í Vestmannaeyjar og sér örugglega ekki eftir því í dag en strákurinn átti sinn besta leik á tímabilinu um helgina.
Elliði Snær skoraði fimm mörk úr fimm skotum í leiknum en það var þó eitt marka hans sem stóð upp úr.
Elliði skoraði nefnilega glæsilegt sirkusmark eins og Gummersbach vakti athygli á inn á samfélagsmiðlum sínum.
Það má sjá þetta geggjaða sirkusmark Eyjamannsins hér fyrir neðan.
Elliði Snær hélt annars upp á 22 ára afmælið sitt um helgina og það var því ekki slæmt að skora svona sirkusmark í tilefni afmælisins.
