Telur skilaboð sóttvarnayfirvalda hafa valdið kæruleysi

Kári Stefánsson forstjóri Íslenskrar erfðagreiningar hefur áhyggjur af þróun kórónuveirufaraldursins síðustu daga þar sem smitum hefur fjölgað nokkuð en faraldurinn virtist vera í rénun þar til á fimmtudag. 

„Mér finnst þetta svona frekar ískyggilegt. Okkur gengur illa að slökkva á þessu núna og ver en í vor. Fólk á erfiðara með að fara að fyrirmælum sóttvarnaryfirvalda,“ segir Kári. 

Fyrir um viku sagði Þórólfur að mögulega yrði hægt að gera einhverjar tilslakanir í sóttvarnaaðgerðum í desember. Kári gagnrýnir að yfirvöld spái fyrir um framtíðina. 

„Þó að sóttvarnayfirvöld hafi staðið sig býsna vel þá finnst mér þeim hafa mistekist að  hemja væntingar og jafnvel vakið of miklar væntingar. Eins og þegar þau sögðu fyrir tveimur vikum að nú ætluðu þau að létta á aðgerðum eftir viku. Um leið og þú segir það þá tekur fólk því sem svo að hægt sé að vera kærulausari en áður,“ segir Kári.

Hann segir að í þessu tilliti sé hægt að læra af væntingarstjórnun fjármálamarkaða. 

„Fyrirtæki á markaði mega ekki spá fyrir um framtíðina. Ég tel að í sóttvörnum eigi að gera það sama, þú átt ekki að segja fólki að þú munir kannski létta á aðgerðum eftir einhvern smá tíma. Mér finnst þetta vera mesti veikleikinn í aðgerðum sóttvarnayfirvalda, sem hafa að öðru leyti staðið sig afskaplega vel. Við getum ekki spáð fyrir um hvað gerist næst og við eigum ekki að reyna það. Það á að tala þannig að þetta sér grafalvarlegt og biðja fólk um að halda þetta út,“ segir Kári.

Telur núverandi aðgerðir standa til næsta árs

Aðspurður um hvort hann sé með ráðleggingar til sóttvarnalæknis vegna næstu tillagna í sóttvörnum svarar Kári:

„Það er engin ástæða til að segja Þórólfi fyrir verkum. Hann hefur staðið sig býsna vel hingað til. Mér finnst ólíklegt að núverandi aðgerðum verði aflétt. Það er engin ástæða til að liðka til núna því við erum að horfa á mjög óræða mynd þegar kemur að þessari farsótt. Ég reikna ekki með að fólk fari að breyta til fyrr en í byrjun næsta árs,“ segir Kári. 

Fram hefur komið að aukning smita nú sé hægt að rekja til eins eða örfárra hópsýkinga. 

„Það má vel vera að hægt sé að rekja smitin núna til örfárra boða en þau eru komin út í samfélagið.  Líkt og þegar þriðja bylgja faraldursins hófst með tveimur hópsmitum í öldurhúsum Reykjavíkur.  Um leið og kötturinn er kominn úr sekknum þá hemur þú hann ekki aftur,“ segir Kári.