Sjáðu markið sem Scholz skoraði gegn Liverpool og markið sem var dæmt af

Liverpool gerði 1-1 jafntefli við Midtjylland á Jótlandi í D-riðli. Mohamed Salah kom Englandsmeisturunum yfir eftir aðeins 55 sekúndur. Liverpool hefur aldrei skorað jafn snemma í Meistaradeildinni.

Mark Salahs var hans 22. Meistaradeildarmark fyrir Liverpool. Hann er nú orðinn markahæstur Liverpool-manna í keppninni frá upphafi.

Alexander Scholz, fyrrverandi leikmaður Stjörnunnar, jafnaði fyrir Midtjylland úr vítaspyrnu á 62. mínútu. Scholz skoraði aftur fjórtán mínútum síðar en markið var dæmt af eftir að það var skoðað á myndbandi. Takumi Minamino virtist svo hafa tryggt Liverpool sigurinn undir lokin en markið var sömuleiðis dæmt af.

Liverpool vann D-riðilinn en Midtjylland endaði í fjórða og neðsta sæti hans. Scholz lék alla sex leiki Midtjylland í riðlakeppninni og skoraði tvö mörk. Mikael Neville Anderson kom inn á sem varamaður hjá dönsku meisturunum í leiknum í gær.

Karim Benzema sá til þess að Real Madrid vann B-riðilinn þegar hann skoraði bæði mörk liðsins gegn Borussia Mönchengladbach. Lokatölur 2-0, Real Madrid í vil.

Benzema kom Real Madrid yfir á 8. mínútu með skalla eftir fyrirgjöf Lucas Vázquez. Á 32. mínútu skoraði Benzema aftur með skalla eftir fyrirgjöf frá hægri, að þessu sinni frá Rodrygo. Fleiri urðu mörkin ekki og Real Madrid fagnaði því sigri í leiknum og sigri í riðlinum.

Mörkin úr leikjum Midtjylland og Liverpool og Real Madrid og Gladbach má sjá hér fyrir neðan.

Meistaradeild Evrópu er á Stöð 2 Sport en upplýsingar um útsendingar má finna hér. Meistaradeildin er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.