Friðrik Ingi hættur hjá Þór

Friðrik Ingi Rúnarsson er hættur sem þjálfari karlaliðs Þórs Þ. í körfubolta. Þetta kemur fram á Hafnarfréttir.is.

Þar segir að vegna þeirrar óvissu sem ríki í samfélaginu hafi körfuknattleiksdeild Þórs og Friðrik Ingi komist að samkomulagi um að hætta samstarfinu.

Friðrik Ingi tók við Þórsurum fyrir tímabilið sem er nú lokið vegna kórónuveirufaraldursins. Þór endaði í 9. sæti Domino's deildar karla. Þórsarar unnu sjö leiki og töpuðu 14 í deildinni.

Friðrik Ingi hefur komið víða við á löngum ferli en auk Þórs hefur hann þjálfað Njarðvík, KR, Grindavík, Keflavík og íslenska karlalandsliðið.

Hann stýrði Þór í síðasta sinn þegar liðið tapaði fyrir Keflavík, 78-63, föstudaginn 13. mars. Það var jafnframt síðasti leikur Íslandsmótsins í körfubolta tímabilið 2019-20.