Framtíð Lækjarbrekku óljós eftir lokun

Veitingastaðnum Lækjarbrekku á Bankastræti hefur verið lokað. Eigendur staðarins greina frá því á vefsíðu Lækjarbrekku að vonast sé til þess að lokunin sé einungis tímabundin. Það verði þó að koma í ljós.

Faraldur kórónuveirunnar með meðfylgjandi samkomubanni hefur sett afkomu fjölmargra fyrirtækja í óvissu. Lækjarbrekka hafði gert ráðstafanir vegna faraldursins og hafði viðskiptavinum verið boðinn afsláttur af mat ef hann yrði sóttur.

Í yfirlýsingunni á vef Lækjarbrekku segir „Okkur finnst það sorglegt, erfitt og leiðinlegt að þurfa að grípa til þess [að loka] og langaði að þrauka yfir þessa undarlegu tíma.“

Lækjarbrekka hefur verið til húsa að Bankastræti 2 í yfir tuttugu ár en við hlið staðarins er Humarhúsið sem er í eigu sömu eigenda.

Þó ekki sé komið á hreint hver endanleg afdrif veitingastaðarins Lækjarbrekku verða þakka eigendur staðarins viðskiptavinum og starfsfólki fyrir samstöðuvilja og velvild í sinn garð í gegnum árin.