„Maður er undir öryggisgæslu á ákveðnum stað til að mynda allt sem gerist, heimspressan var þarna og ég var fyrir hönd Íslands svo ég fékk að fara inn,“ útskýrir RAX. Hann sagði frá ljósmyndunum frá þessum degi, í nýjasta þættinum af RAX Augnablik.
Myndirnar sem hann tók af þeim Reagan og Gorbachev birtust í fjölmiðlum hér heima og erlendis, en myndin sem vakti mesta athygli varð til eftir góð ráð frá erlendum kollega frá AP fréttastofunni.
Ekki klára filmuna
„Þar var frægur ljósmyndari Ron Edmonds Pulitzer verðlaunahafi, sem að hafði myndað Íran þegar allt var í uppnámi þar. Hann var svolítill töffari. Við förum í gegnum öryggisleit og förum svo í rútu á staðinn og ég ákvað að negla mig á hann og sest við hliðina á honum og spyr hvort ég megi spyrja spurninga, hann er vanur að gera þetta en ekki ég.“
Eitt af ráðunum sem Edmonds gaf RAX í rútunni, var að klára ekki alla 36 mynda filmuna strax heldur bíða þar til ljósin yrðu slökkt því þá væri oft hægt að ná augnablikum. Slíku augnabliki náði RAX svo sannarlega.
„Þegar þeir slökktu ljósin þá litu þeir á hvorn annan.“
Í þættinum segir RAX einnig frá því þegar reynt var að stela aðgangspassanum hans, enda vildu allir komast nær leiðtogunum þennan dag. Einnig lýsir hann því hvernig honum leið eins og á vaxmyndasafni og kom þá prakkarinn upp í honum.
RAX fékk einnig það hlutverk að mynda Frú Vigdísi Finnbogadóttur og Ronald Reagan saman við þetta tilefni og sagði hann frá þeim ljósmyndum í fyrsta þættinum af RAX Augnablik. „Hún náttúrulega heillar alla upp úr skónum,“ segir hann þar meðal annars um fyrrum forsetann okkar.
„Þeir verða eins og litlir strákar í höndunum á henni.“
Söguna má finna í spilaranum hér fyrir neðan en þar segir hann frá samskiptum forsetanna tveggja, bandaríska öryggisverðinum sem hjálpaði honum þennan dag og dularfulla stóra frakkanum sem Reagan klæddist á Íslandi.
Í þáttunum RAX AUGNABLIK segir ljósmyndarinn Ragnar Axelsson sögurnar á bak við margar af sínum þekktustu myndum. Ragnar hefur starfað á vettvangi í meira en fjörutíu ár og eru sögurnar hans ævintýralegar. Nýr þáttur kemur út á hverjum sunnudegi hér á Vísi og á Stöð 2+.
Hægt er að sjá alla þættina HÉR á Vísi.
