Gylfi skorar bara með fyrirliðabandið

Seamus Coleman sat á bekknum í gær og Gylfi Þór Sigurðsson var því með fyrirliðabandið í leiknum en það hefur oft boðað gott á þessu tímabili.

Gylfi var líka með fyrirliðabandið þegar hann skoraði sigurmarkið á móti Chelsea í desember og sigurmarkið á móit Sheffield United á öðrum degi jóla.

Gylfi var líka fyrirliði Everton í 3-0 sigri á Salford í enska deildabikarnum í september en þá skoraði hann fyrsta mark sitt á leiktíðinni.

Þetta var fjórða mark Gylfa með fyrirliðabandið á tímabilinu en öll mörkin hans hafa því komið sem fyrirliði Everton. Hann á enn eftir að skora á leiktíðinni þegar hann spilar sem óbreyttur leikmaður.

Allar stoðsendingar Gylfa nema ein hafa líka komið í leikjum sem Gylfi hefur leitt Everton liðið út á völlinn.

Gylfi hefur því komið að sjö mörkum í ellefu leikjum sem fyrirliði en aðeins einu marki í fjórtán leikjum þar sem hann hefur ekki verið með bandið.

Gylfi fékk reyndar fyrirliðabandið í þeim leik þegar Seamus Coleman fór meiddur af velli en var þá búinn að leggja upp mark fyrir Dominic Calvert-Lewin.