Sandra ólétt en Leverkusen bíður með dyrnar opnar

Sandra, sem er Akureyringur, greinir frá þessu í samtali við Akureyri.net. Hún er 26 ára gömul og á þýskan kærasta, og hyggst fjölskyldan búa saman í Wuppertal sem er skammt frá Leverkusen.

Sandra flutti til Þýskalands eftir að hafa verið útnefnd leikmaður ársins í Pepsi Max-deild kvenna árið 2018, þegar hún lék með Þór/KA. Hún hefur því leikið síðustu tvö ár með Leverkusen og var einnig að láni hjá félaginu framan af ári 2016.

Samningur Söndru við Leverkusen rennur útí sumar og óvíst er hvað tekur við hjá henni þegar hún snýr aftur í fótboltann.

„Ég verð samningslaus í lok júlí og fer þá beint í fæðingarorlof en þangað til held ég mínum launum hjá liðinu. Forráðamenn liðsins hafa líka tilkynnt mér að ég sé velkomin aftur um leið og ég vil og treysti mér til, og það er gott að fara með þá vitneskju inn í meðgönguna. Svo kemur bara í ljós hvað maður gerir eftir að vera kominn með barn í hendurnar,“ segir Sandra við Akureyri.net. 

Þar segir hún drauminn að snúa svo aftur í íslenska landsliðið en Ísland leikur í lokakeppni EM sumarið 2022. Sandra hefur leikið 31 A-landsleik, þann fyrsta aðeins sautján ára, og skorað í þeim sex mörk, meðal annars í fyrsta leiknum gegn Ungverjalandi árið 2012.