Bar því við að hafa ekki haft nægi­lega þekkingu á lífs­loka­með­ferðum

Læknirinn hafði starfað við Heilbrigðisstofnun Suðurnesja frá árinu 2018 eða þar til hann lét sjálfur af störfum eftir að athugasemdir bárust um störf hans. Hann er meðal annars sakaður um að hafa sent fólk í lífslokameðferð án þess að þörf væri á því. 

Samkvæmt heimildum fréttastofu bar læknirinn því við að hafa ekki haft nægilega þekkingu á slíkum meðferðum, sem hann hafði umsjón með hjá HSS.

Kvartað vegna annars læknis

Heimildir fréttastofu herma einnig að vinnubrögð fleiri starfsmanna séu til skoðunar en embætti landlæknis gat ekki tjáð sig um málið að neinu leyti. Þá hafa kvartanir verið gerðar vegna meintrar vanrækslu annars læknis sem starfaði hjá stofnuninni en í svari sem aðstandendur fengu segir að málið verði ekki tekið til skoðunar þar sem sjúklingurinn sé látinn.

Fréttastofa hefur rætt við íbúa á Suðurnesjum sem hafa lýst þungum áhyggjum yfir starfsemi Heilbrigðisstofnunar Suðurnesja og sumir hverjir segjast hafa fært lögheimili sitt til þess eins að þurfa ekki að leita þangað.

Veigra sér við því að leita á heilsugæsluna

Samkvæmt könnun sem Maskína gerði í síðustu viku um traust fólks til heilsugæslna á landsbyggðinni virðast Suðurnesjamenn bera minnst traust til sinnar heilsugæslu. 24,5 prósent þeirra bera fremur eða mjög lítið traust til heilsugæslunnar.

Guðbrandur Einarsson forseti bæjarstjórnar Reykjanesbæjar sagði í beinni útsendingu í kvöldfréttum Stöðvar 2 að margt gæti skýrt þetta litla traust Suðurnesjamanna til heilsugæslu sinnar.

„Þessi niðurstaða var svosem viðbúin. Við erum búin að vera að glíma við margþættan vanda varðandi þessa heilsugæslu í áratugi og því miður þá virðist sá vandi ekki vera að leysast. Við búum hérna 27 þúsund manns á svæðinu og ein lítil snotur heilsugæsla getur ekki uppfyllt þarfir allra þeirra.“

Þá sagði hann fólk hafa veigrað sér við því að leita á heilsugæsluna á Suðurnesjum.

„Þú þarft að bíða lengi eftir að komast að hjá læknim, þú hefur ekki þinn eigin heilsugæslulækni og ég hef vitneskju um það að nokkur þúsund Suðurnesjamanna hafa leitað inn á höfuðborgarsvæðið og sótt sér heilsugæslulækni þar.“

Inntur eftir því hvort bæjarstjórn myndi bregðast við hinu alvarlega atviki sem nú er til skoðunar hjá HSU sagði Guðbrandur að hún væri ekki með málið á sinni könnu.

„Vissulega hörmum við þennan atburð sem þarna á sér stað en ég hef engar forsendur til að tjá mig um slíkt.“

Landlæknir rannsakaði mál læknisins og niðurstöðurnar eru afdráttarlausar. Þar segir að röð alvarlegra mistaka hafi verið gerð, en þau beinast meðal annars að því að læknirinn hafi sent fólk í líknandi meðferð án þess að þörf væri á því. Hann er ekki lengur með starfsleyfi og hefur ekki viljað tjá sig við fréttastofu vegna málsins. Mál hans er komið á borð lögreglu. Þá hefur heilbrigðisráðherra einnig verið upplýstur um mál læknisins.